BAKI, AzerVoice, Nərmin Ağayeva
ABŞ prezidenti Donald Tramp Ukraynada mümkün sülh razılaşması fonunda Avropa qüvvələrinə hava dəstəyi verməyə hazır olduqlarını açıqlayıb.
AzerVoice xəbər verir ki, Tramp Zelenski və Avropa liderləri ilə görüşdən sonra Ukraynaya çoxmillətli qüvvələrin göndərilməsi ideyasını gündəmə gətirib. ABŞ ordusunun quru qoşunlarını yerləşdirməyəcəyini bildirən Tramp, hava hücumundan müdafiə, döyüş təyyarələri və kəşfiyyat imkanları ilə Avropa qoşunlarını dəstəkləmək variantlarını nəzərdən keçirdiklərini vurğulayıb.
Müzakirələrdə Putinin iştirakı ilə sammit üçün üç şəhərin adı çəkilir: Budapeşt, Cenevrə və Moskva. Macarıstanın seçilməsi Zelenski üçün riskli hesab olunur, çünki baş nazir Viktor Orban Putinin yaxın müttəfiqi sayılır. Fransa prezidenti Emmanuel Makron isə Cenevrəni ən uyğun seçim kimi təqdim edib. Rusiya isə sammitin Moskvada keçirilməsini gündəmə gətirib.
Qeyd edək ki, Rusiya XİN sözçüsü Mariya Zaxarova Ukraynaya NATO qüvvələrinin yerləşdirilməsini “nəzarətsiz eskalasiya” riski daşıyan addım kimi qiymətləndirib. ABŞ tərəfi isə hələlik təhlükəsizlik zəmanətlərinin konkret şərtlərini açıqlamayıb.
