BAKI, AzerVoice, Səməd Əyyubov
İsrail mənbələrinin məlumatına görə, baş nazir Benyamin Netanyahu Qəzza şəhərinin işğalını dayandırmaq niyyətində deyil. Əsirlərin azad edilməsi üçün aparılan danışıqlar barədə açıqlamalarına baxmayaraq, o, bu məsələdə tələsmir. Əksinə, Netanyahu şəhərin işğalını sürətləndirmək və hətta əməliyyatın adının dəyişdirilməsi ilə bağlı ordu ilə mübahisəyə girib.
AzerVoice xəbər verir ki, İsrail ordusu artıq Qəzza şəhərinin işğalına hazırlıqlara başlayıb. Dörd briqada şəhərin kənarlarında və ətraf məhəllələrdə təlimlər keçirir.
“Ümumi təəssürat odur ki, baş nazir əməliyyatı sona qədər aparmaqda qətiyyətlidir. Çünki anlayır ki, bu addım olmadan hökuməti bir yerdə saxlaya bilməyəcək və kabinet dağılacaq” - deyə, “Maariv” qəzetinə danışan hərbi mənbə bildirib.
Sentyabrın 2-də yay tətilinin başa çatmasından sonra qüvvələrin bərpası və ehtiyat hərbi hissələrin səfərbər edilməsi də əməliyyatlara tam hazırlığın göstəricisi kimi dəyərləndirilir.
Qeyd edək ki, İsrail televiziyasının məlumatına görə, ordu artıq “Gideonun arabaları 2” adlı planı icra etməyə başlayıb. Bu plan çərçivəsində Qəzza şəhərinin işğalına hazırlıq məqsədilə Zeytun və Cəbəliyə məhəllələrində hərbi fəaliyyətlərin genişləndirilməsi nəzərdə tutulur.
Hazırda Qəzza zolağında vəziyyət son dərəcə gərgin olaraq qalır. İsrail ordusunun hücumları davam edir və bölgədə humanitar böhran getdikcə dərinləşir.
