BAKI,AzerVoice, Fərid Mikayılov
İranın xarici işlər naziri Seyid Abbas Əraqçi Avropa üçlüyünün (Fransa, Almaniya və Britaniya) “Snapback” mexanizmini işə salmaq cəhdini qanunsuz və əsassız addım kimi qiymətləndirib.
AzerVoice xəbər verir ki, Əraqçi bu fikirləri Avropa İttifaqının xarici siyasət üzrə ali nümayəndəsi Kaya Kallas ilə cümə axşamı axşam saatlarında baş tutan telefon danışığında səsləndirib.
Əraqçi Avropa ölkələrinin bu qərarının İranın nüvə məsələsindəki niyyətlərinə dair şübhələri dərinləşdirdiyini vurğulayıb.
“Avropanın bu təxribatçı və yersiz addımı diplomatik səylərə yeni maneələr yaradır. Tehran buna adekvat cavab verəcək” – deyə nazir qeyd edib.
Öz növbəsində Kallas siyasi həll yolunun vacibliyini vurğulayıb və diplomatik əlaqələrin davam etdirilməsinə hazır olduğunu bildirib. O, tərəflər arasında təmasların və məsləhətləşmələrin davam etdirilməsinin zəruriliyini qeyd edib.
Qeyd edək ki, Avropa üçlüyü ötən gün BMT Təhlükəsizlik Şurasına müraciət edərək, 2231 saylı qətnamə ilə ləğv olunan sanksiyaların bərpası üçün Mübahisələrin Həlli Mexanizminin (DRM) – yəni “Snapback” mexanizminin – işə salınmasını rəsmən tələb edib.
