BAKI,AzerVoice
İran Xarici İşlər Nazirliyi ABŞ və Avropanı nüvə danışıqlarında qeyri-ciddi mövqe tutmaqda və birtərəfli təzyiqlər göstərməkdə ittiham edib.
AzerVoice xəbər verir ki, nazirliyin sözçüsü İsmail Bəqai bu gün keçirdiyi mətbuat konfransında bildirib ki, Avropa “troikası”nın (Almaniya, Fransa və Böyük Britaniya) əvvəlcədən şərtlər irəli sürməsi onların səmimiyyətsizliyini göstərir.
“Vaşinqton yaxşı niyyət ortaya qoymur, əksinə İrana qarşı qanunsuz təzyiqləri davam etdirir. Avropa ölkələri də ABŞ və İsrailin tələbi ilə ‘mexanizm-i zənəd’ (sanksiyaların avtomatik bərpası) prosesini işə salıblar” –deyə, Bəqai bildiirb.
Bəqainin sözlərinə görə, BMT Təhlükəsizlik Şurasında oktyabrda qüvvəyə minməsi gözlənilən “mexanizm-i zənəd” İranın üzərinə yenidən sanksiyaların qoyulmasını nəzərdə tutur.
Çin və Rusiya isə bazar ertəsi yayımladıqları birgə bəyanatda Avropanın qərarını qanunsuz adlandıraraq Tehrana dəstək veriblər. Həmin bəyanat İranın xarici işlər naziri Abbas Əraqçi tərəfindən “X” platformasında dərc olunub.
İran rəsmisi həmçinin qeyd edib ki, Tehran hələlik Beynəlxalq Atom Enerjisi Agentliyi (AİA) ilə əməkdaşlığın bərpası barədə qərar verməyib.
Tehran agentliyi ABŞ və İsrailin nüvə obyektlərinə hücumlarına zəmin hazırlamaqda ittiham edir. Qeyd edək ki, İran parlamenti ötən ay AİA ilə əməkdaşlığın dayandırılmasını nəzərdə tutan qanunu təsdiqləyib.
