BAKI, AzerVoice, Səməd Əyyubov
Böyük Britaniyada İsraillə işləyən şirkətlərə qarşı aksiyaları ilə tanınan və iyul ayında qadağan edilən “Palestine Action” qrupuna dəstək məqsədilə Londonda keçirilən etirazlarda kütləvi həbslər baş verib.
AzerVoice-un məlumatına görə, “Defend Our Juries” təşkilatının çağırışı ilə yüzlərlə insan paytaxtın Parlament Meydanında toplaşaraq yerli vaxtla saat 13:00-da etiraza başlayıb. Aksiya iştirakçıları “Soyqırıma yox, Palestine Action-a dəstək verirəm” şüarları yazılmış pankartlar qaldırıblar.
Polisin müdaxiləsi ilə etiraz aksiyası gərginləşib. London Polisi açıqlama verərək saxlanmaların əksəriyyətinin qadağan edilmiş qrupa dəstək göstərilməsi səbəbilə həyata keçirildiyini bildirib.
“Ümumilikdə 857 nəfər ‘Palestine Action’a dəstək verdikləri üçün 2000-ci il Terrorizm Qanununun 13-cü bölməsi əsasında saxlanılıb. Bundan əlavə, 17-si polis əməkdaşına hücum olmaqla, ümumilikdə 33 nəfər digər ictimai asayiş pozuntuları səbəbilə həbs edilib” - deyə, açıqlamada bildirilib.
İyulun 5-də, bu qadağanın qüvvəyə mindiyindən bəri “Palestine Action”a dəstək verən yüzlərlə iştirakçı müxtəlif aksiyalarda həbs olunub. Son olaraq, avqustun 9-da keçirilən oxşar etirazda 500-dən çox insan saxlanılmışdı.
“Palestine Action”ın terrorçu təşkilat elan edilməsinin ilk addımı ötən il iyulun 20-də atılıb. Həmin gün qrupun üzvləri RAF-ın Brize Norton hərbi bazasına daxil olaraq 2 britaniya hərbi təyyarəsinin mühərrikinə qırmızı boya yaxmışdılar. Aktivistlər təyyarələrin Yaxın Şərqdə əməliyyatlarda istifadə edildiyini bildirərək orada Fələstin bayrağı qaldırmışdılar.
Bu insidentdən sonra daxili işlər naziri İvet Kuper, qrupun Avropada fəaliyyət göstərən iki ifrat sağçı təşkilatla birlikdə “terrorçu təşkilat” elan edilməsini nəzərdə tutan qanun layihəsini parlamentə təqdim etdi.
