BAKI,AzerVoice, Fərid Mikayılov
İran Xarici İşlər Nazirliyinin sözçüsü İsmayıl Bəqai ABŞ dəstəyi ilə Avropa ölkələrinin İrana qarşı BMT Təhlükəsizlik Şurası (TŞ) qətnamələrini bərpa etmək təşəbbüsünü yenidən sərt tənqid edib.
AzerVoice xəbər verir ki, o, bu addımı əsassız və qanunsuz adlandırıb.
Bəqai bildirib ki, üç Avropa ölkəsinin JCPOA (2015-ci il nüvə sazişi) üzrə mübahisə mexanizmindən sui-istifadəsi heç bir hüquqi nəticə doğurmur və 2231 saylı qətnamə mətninə əsasən müəyyən olunmuş tarixdə – 18 oktyabr 2025-ci ildə – qüvvədən düşməlidir.
Nazirlik sözçüsü ABŞ, Böyük Britaniya, Fransa və Almaniyanın BMT sanksiyalarını bərpa etmək cəhdlərini əsassız və hüquqi baxımdan etibarsız adlandırıb. Onun sözlərinə görə, BMT TŞ-nin təxminən yarısı, o cümlədən iki daimi üzv ölkə, bu addımı “qanuni və legitim” hesab etmir.
Bəqai vurğulayıb ki, 15 Şura üzvündən 6-sının İrana qarşı qətnamələrin bərpasını dəstəkləməməsi bu məsələdə ciddi fikir ayrılığını ortaya qoyur.
İran rəsmiləri uzun müddətdir ki, Avropa ölkələrinin “snapback mexanizmini” işə salmaq hüququ olmadığını bildirirlər. Tehran xatırladır ki, ABŞ-ın 2018-ci ildə JCPOA-dan birtərəfli çıxışından sonra Avropa tərəfi də öhdəliklərini pozub. Buna cavab olaraq İran nüvə sazişindəki öhdəliklərini mərhələli şəkildə azaltdığını bəyan edib.
