BAKI, AzerVoice, Nailə Babazadə
Venesuela Prezidenti Nikolas Maduro müxalifət lideri Mariya Korina Maçadonu “şeytan və sehrbaz” adlandırıb. Açıqlama, Maçadonun Nobel Sülh Mükafatı ilə təltif edilməsindən iki gün sonra səslənib.
AzerVoice xəbər verir ki, Nobel Komitəsi 58 yaşlı Maçadonu “Venesuelada diktaturadan demokratiyaya ədalətli və dinc keçid uğrunda mübarizəsinə görə” mükafatlandırmışdı. Lakin Maduro çıxışında onun adını çəkmədən, “xalqın 90 faizi bu şeytani sehrbaza qarşıdır” deyərək Maçadonu xarici müdaxiləyə çağırış etməkdə ittiham edib.
ABŞ administrasiyası uzun illərdir Maduro hökumətinə qarşı çıxır. Donald Tramp dövründə Vaşinqton Karib dənizində, Venesuela sahillərinə yaxın ərazidə hərbi donanma yerləşdirmişdi. Rəsmi Karakas isə Maçadonu tez-tez “La Sayona” - Venesuela folklorunda intiqamçı ruh kimi tanınan qadın obrazı — adlandırır.
Maduro “Amerikanın kəşfi”nin ildönümünə həsr olunmuş tədbirdə çıxış edərək bildirib ki, “biz sülh istəyirik və sülh içində yaşayacağıq, lakin azadlıq və suverenliklə”.
Maçado isə ABŞ-ın bölgədəki hərbi təlimlərini dəstəkləyib və Nobel mükafatını “əzab çəkən Venesuela xalqına” həsr etdiyini açıqlayıb. O, “Fox News”a müsahibəsində ABŞ Prezidenti Donald Trampı da tərifləyərək, onun “bir neçə ay ərzində səkkiz müharibəni dayandırdığını və Venesuelanın azadlığa yaxınlaşmasında həlledici rol oynadığını” deyib.
