BAKI,AzerVoice
Qətər Xarici İşlər Nazirliyi bazar günü bəyan edib ki, Pakistan və Əfqanıstan arasında Dohada keçirilən danışıqlar zamanı “dərhal atəşkəs” barədə razılıq əldə olunub. Bu razılaşma, əvvəlki atəşkəsin pozulmasından sonra Pakistanın hava zərbələri nəticəsində azı 10 nəfərin ölümü ilə nəticələnən toqquşmalardan sonra əldə edilib.
Nazirliyin açıqlamasında bildirilib ki, tərəflər atəşkəsin dərhal qüvvəyə minməsi və ölkələr arasında uzunmüddətli sülh və sabitliyi təmin etmək üçün mexanizmlərin yaradılması barədə razılaşıblar.
Pakistanın müdafiə naziri Xəvacə Məhəmməd Asif “X” platformasında (keçmiş “Twitter”) paylaşım edərək iki Cənubi Asiya ölkəsi arasında atəşkəs razılaşmasına nail olunduğunu açıqlayıb. Onun sözlərinə görə, tərəflər 25 oktyabrda İstanbulda yenidən görüşərək “ətraflı məsələləri” müzakirə edəcəklər.
Qətər XİN əlavə edib ki, Türkiyə ilə birgə vasitəçilik etdiyi danışıqlardan sonra keçiriləcək növbəti görüşlər “atəşkəsin davamlılığını və etibarlı şəkildə yerinə yetirilməsini təmin etmək” məqsədi daşıyır.
Pakistan və Əfqanıstan, son aylarda onlarla insanın ölümü və yüzlərlə nəfərin yaralanması ilə nəticələnən toqquşmalardan sonra gərginliyin azaldılması istiqamətində addımlar atmağa çalışır. Danışıqlara Pakistan tərəfdən Xəvacə Asif, Əfqanıstan tərəfdən isə müdafiə naziri Məhəmməd Yaqub rəhbərlik edib.
Son aylarda iki ölkə arasındakı 2600 kilometrlik mübahisəli sərhəd boyunca gərginlik artıb. Pakistan, Əfqanıstan hökumətini “Pakistan ərazisinə hücum edən silahlı qrupları cilovlamamaqda” ittiham edir və bu hücumların Əfqanıstan ərazisindən həyata keçirildiyini bildirir.
Taliban hökuməti isə bu ittihamları rədd edərək, Pakistan ordusunu yanlış məlumat yaymaqda, sərhəddə gərginlik yaratmaqda və “İŞİD-lə əlaqəli qrupları sığınacaqla təmin etməkdə” günahlandırır.
Cümə günü Pakistan-Əfqanıstan sərhədi yaxınlığında baş vermiş intihar hücumu nəticəsində 7 Pakistan əsgəri həlak olub, 13 nəfər yaralanıb.
Pakistan ordusunun baş komandanı Asim Münir şənbə günü hərbi məzuniyyət mərasimində çıxış edərək: “Əfqanıstan rejimi, Pakistan daxilində dəhşətli hücumlar həyata keçirən və Əfqanıstan torpaqlarından istifadə edən agentlərini cilovlamalıdır.”-deyə bildirib.
