BAKI,AzerVoice, Orxan Qədirzadə
Almaniya, İsrail ilə 2 milyard avro dəyərində yeni silah müqaviləsi imzalayıb.
AzerVoice xəbər verir ki, İsrailin “Haaretz” nəşrinin məlumatına görə, Almaniya, İsrailin “Rafael” şirkətinin istehsalı olan “Spike” tank əleyhinə raket sistemlərini almağa hazırlaşır. Müqavilə “Rafael”in Avropadakı tərəfdaşı “EuroSpike” vasitəsilə imzalanıb və NATO-nun Təchizat Agentliyi (NSPA) tərəfindən həyata keçiriləcək.
Rəsmi məlumatlara əsasən, “EuroSpike” müqaviləsi yalnız raketlərin alınmasını deyil, həm də sistemin istismar müddəti ərzində texniki xidmət, kalibrasiya, təlim və sənədləşmə daxil olmaqla dəstək mexanizmini də əhatə edir. NATO Təchizat və Dəstək Agentliyinin sənədlərinə görə, bu müqavilə son illərin ən böyük silah tədarük razılaşmalarından biri hesab olunur.
Alman hökumətinin parlament sorğusuna cavabında bildirilib ki, 2025-ci ildə “Spike” müqaviləsindən kənar olaraq Alman ordusu İsrail şirkətlərindən ümumilikdə 315 milyon avro dəyərində silah alıb. Bu rəqəm son dörd ildə İsrail silahlarına xərclənən ümumi məbləğdən daha çoxdur.
Qeyd edək ki, Almaniyanın bu addımı Qəzza ilə bağlı davam edən atəşkəs danışıqları fonunda atılıb. Berlinin bu razılaşması, İsrailin beynəlxalq səviyyədə tənqid edildiyi bir dövrdə Təl-Əvivə hərbi-siyasi dəstəyin açıq göstəricisi kimi dəyərləndirilir.
