BAKI,AzerVoice
Nigeriyanın şimal-qərb bölgəsində ordu qüvvələri ilə baş verən toqquşmalarda cinayətkar dəstələrə mənsub 80 nəfər öldürülüb. Bu barədə BMT-nin təhlükəsizlik hesabatına istinadən AFP agentliyi məlumat yayıb.Son illər “quldurlar” kimi tanınan silahlı dəstələr Nigeriyanın şimal-qərb və mərkəzi bölgələrində kəndləri və qəsəbələri basaraq mal-qaranı oğurlayır və girov götürdükləri insanlardan fidyə tələb edirlər.
Ən son hücum zamanı Nigeriya əsgərləri cümə və şənbə günləri Kebi əyalətinin Nqaski bölgəsində böyük bir dəstə ilə qarşıdurmaya girib. BMT hesabatına görə, döyüşlər nəticəsində “80 quldur məhv edilib”.
Hesabatda qeyd olunur ki, əsgərlər silahlıları qonşu Zamfara əyalətindəki bazalarından Kebi əyalətinə “sızmağa cəhd göstərərkən” yaxalayıblar. Ordu bazar günü yayımladığı bəyanatda bildirib ki, qüvvələr beş yaşayış məntəqəsinə “koordinasiyalı hücumlar planlaşdıran quldurları” zərərsizləşdiriblər. Atışma üç saat davam edib.
Ordu bəyan edib ki, əməliyyat zamanı silah-sursat və motosikllər müsadirə olunub, bir nəfər girov xilas edilib. Lakin insan itkiləri barədə məlumat verilməyib. BMT hesabatında əlavə olunur ki, Kebi əyaləti hələ də sərhəd boyunca hərəkət edən quldur dəstələrinin hücumlarına məruz qalır.
Hesabatda bildirilir ki, ölkənin şimal-qərbində Sahel bölgəsində fəaliyyət göstərən terror qrupları ilə əlaqəli “Lakurawa” (Lakurava) adlı yeni qrupun meydana çıxması təhlükəsizlik vəziyyətinin daha da pisləşməsinə səbəb olub.
Nigeriyada quldur böhranı əvvəlcə fulani köçəriləri ilə əkinçi icmalar arasında toqquşmalardan başlayıb, lakin sonradan silah alveri ilə qidalanan daha genişmiqyaslı münaqişəyə çevrilib. Cinayətkar dəstələr dövlətin nəzarətinin zəif olduğu kənd yerlərində yaranan təhlükəsizlik boşluğundan istifadə edirlər.
Rəsmilər, əsasən maliyyə maraqları ilə hərəkət edən bu cinayətkar dəstələr və 16 ildir ölkənin şimal-şərqində “İslam xilafəti” qurmaq uğrunda döyüşən cihadçılar arasında artan əməkdaşlıqdan narahatlıqlarını ifadə ediblər.
