Bakı,AzerVoice, Orxan Qədirzadə
ABŞ Nümayəndələr Palatasının Xarici Əlaqələr Komitəsinin sədri, respublikaçı kongresmen Brian Mast uzun müddət əleyhinə çıxış etdiyi “Sezar Aktı” sanksiyalarının ləğvinə dəstək verdiyini bəyan edib. AzerVoice xəbər verir ki, Mast qərar dəyişikliyini ABŞ və Suriya keçid rəhbərliyinin qarşılıqlı öhdəlikləri daxilində şərti şəkildə dəstəklədiyini bildirib.
Mastın mövqeyindəki dəyişiklik Konqresin Müdafiə Səlahiyyətləri Aktı (NDAA) üzrə danışıqları sürətləndirdiyi bir vaxtda baş verib və sənədin dekabrın əvvəlində səsverməyə çıxarılacağı gözlənilir.
Konqres üzvü ABŞ administrasiyasının siyasətini əngəlləmədiyini vurğulayaraq bildirib ki, hazırkı qanun yalnız sanksiyaların altı aylıq dayandırılmasına imkan verir və bu, Suriyanın yeni mərhələsi üçün yetərli mexanizm deyil.
Mast sanksiyaların tam ləğvinə razılıq versə də, qanuna təkrar tətbiq mexanizmi əlavə edilməsini tələb edir. Konqres mənbələrinə görə, müzakirə olunan şərtlər arasında azlıqların müdafiəsi, terrorla mübarizə tədbirləri və İsraillə uzunmüddətli sülh prosesinə qoşulma məsələləri yer alır.
Şərtsiz ləğvi dəstəkləyən qanunvericilər isə hesab edir ki, sanksiyaların geri qaytarılması ilə bağlı istinadlar ABŞ şirkətləri və müttəfiq dövlətlər üçün investisiya riskini artıracaq və ölkədə bərpa prosesini ləngidəcək.
Mastın mövqeyi bir neçə həftədir Ağ Ev, respublikaçı fraksiya və Prezident Donald Trampın milli təhlükəsizlik komandası ilə aparılan danışıqlardan sonra dəyişib.
Tramp Suriyanın keçid prezidenti Əhməd Əl-Şəraa ilə görüş zamanı onu “çətin şəraitdən çıxıb güclü liderə çevrilən şəxs” adlandıraraq Vaşinqtonun Dəməşqdəki yeni hökumətə dəstəyini açıqlamışdı.
2019-cu ildə qüvvəyə minmiş “Sezar Aktı” Suriya dövlət qurumları ilə maliyyə əməliyyatlarını qadağan edir və Dəməşqlə əməkdaşlıq edən xarici tərəflərə sanksiyalar tətbiq olunmasını nəzərdə tutur. Akt keçmiş rejimin insan haqları pozuntularına görə təzyiq aləti hesab edilir.
Sanksiyaların ləğvinə qarşı çıxanlar hesab edir ki, bu addım keçid hakimiyyətinə “şərtsiz kredit” verəcək və bəzi konqres üzvlərinin Əl-Şəraa ilə bağlı keçmiş iddialar və azlıqlara münasibət mövzusundakı şübhələrini artıracaq.
Veteran hərbçi olan Brian Mast 2010-cu ildə Əfqanıstanda mina partlayışı nəticəsində hər iki ayağını itirib. 2016-cı ildən siyasətdə fəaliyyət göstərir və respublikaçıların milli təhlükəsizlik məsələlərində ən sərt mövqeli simalarından biri sayılır. Tramp administrasiyası ilə yaxın əməkdaşlığı ilə tanınır və yaxın Şərq siyasətində təsirli fiqur hesab olunur.
Son həftələrdə Mast “şərti ləğv” mövqeyini müdafiə etməklə həm Trampa uyğunlaşdığı, həm də respublikaçı “şahinlərin” təzyiq vasitələrini qoruduğu qənaətini formalaşdırıb.
Qeyd edək ki, Mast sanksiyaların ən güclü müdafiəçilərindən biri idi.
