Bakı, AzerVoice, Orxan Qədirzadə
Sudanın Sürətli Dəstək Qüvvələri (RSF) ölkənin cənubunda yerləşən strateji nəqliyyat qovşağı Babanusa şəhərinə tam nəzarət etdiyini açıqlayıb. Qüvvələr bunu Sudanın Qərbi Kordofan əyalətində davam edən müharibənin yeni cəbhə xətti kimi qiymətləndirib.
AzerVoice xəbər verir ki, RSF-in bəyanatına görə, şəhərin “azad edilməsi” orduya məxsus bölmələrin “gözlənilməz hücumunun” dəf edilməsindən sonra mümkün olub. Qruplaşma bu hücumu “humanitar atəşkəsin açıq şəkildə pozulması” kimi təqdim edib.
Münaqişə 2023-cü ilin aprelində başlamış və qarşıdurma ölkənin müxtəlif bölgələrində kəskinləşərək davam etmişdi. Noyabrın 19-da ABŞ Prezidenti Donald Tramp döyüşləri dayandırmaq üçün müdaxilə edəcəyini bildirmişdi.
Bundan əvvəl ABŞ, BƏƏ, Misir və Səudiyyə Ərəbistanı üç aylıq atəşkəs və ardınca sülh danışıqlarını nəzərdə tutan plan irəli sürmüşdü. RSF planı qəbul etdiyini bəyan etsə də, qısa müddət sonra ordu mövqelərinə pilotsuz uçuş aparatları ilə hücumlar təşkil etmişdi.
RSF-in Babanusaya hücumu qruplaşmanın Darfur bölgəsində ordunun son dayaq nöqtəsi olan Əl-Fəşiri oktyabrda ələ keçirməsindən sonra sürətlənən irəliləyişinin davamı kimi qiymətləndirilir.
