BAKI, AzerVoice, Orxan Qədirzadə
Avropa Komissiyasının müdafiə və kosmos məsələləri üzrə üzvü Andryus Kubilyus bildirib ki, Rusiya qarşıdakı 3-4 il ərzində Avropa İttifaqı ölkələrinə qarşı real hərbi qarşıdurmaya hazır vəziyyətə gələ bilər.
AzerVoice xəbər verir ki, İtaliyanın paytaxtı Romada səfərdə olan Kubilyus müdafiə naziri Guido Krozetto ilə görüşdən sonra La Stampa qəzetinə müsahibəsində qeyd edib ki, Rusiya iqtisadiyyatı faktiki olaraq hərbi iqtisadiyyata çevrilib və bu, Avropa üçün strateji təhlükə yaradır.
Kubilyusun sözlərinə görə, Avropa xüsusi xidmət orqanları Rusiyanın yaxın illərdə Aİ-na qarşı real hərbi qarşıdurma imkanına malik olacağı barədə açıq xəbərdarlıq edir. O vurğulayıb ki, əsas risklərdən biri Moskvanın potensial təcavüz təhlükəsidirsə, digər risk ABŞ-nin Avropanın müdafiəsində daha az məsuliyyət daşımaq istəməsidir.
Avropa Komissiyası üzvü bildirib ki, dondurulmuş Rusiya aktivləri Ukraynanın hərbi və büdcə ehtiyaclarının maliyyələşdirilməsi üçün əsas mənbələrdən biri ola bilər.
Kubilyus əlavə edib ki, mümkün Rusiya hücumu halında Aİ və NATO 2022-ci ildən etibarən real döyüş təcrübəsi qazanmış Rusiya ordusu ilə üz-üzə qala bilər. Onun sözlərinə görə, Avropada real döyüş təcrübəsinə malik yeganə tərəf Ukraynadır.
Bu baxımdan o, Avropanın müdafiə potensialının gücləndirilməsi üçün Ukraynanın praktiki döyüş imkanlarının Avropa təhlükəsizlik sisteminə inteqrasiya edilməsinin vacibliyini qeyd edib. Kubilyus Böyük Britaniya, Norveç və Ukraynanı əhatə edən yeni təhlükəsizlik arxitekturasının formalaşdırılmasını da mümkün variant kimi dəyərləndirib.
Rusiya-Ukrayna müharibəsinin nizamlanmasına toxunan Avropa rəsmisi bildirib ki, Ukraynanı zəif mövqedə qoyacaq istənilən razılaşma gələcəkdə Rusiyanın yeni təcavüzünü asanlaşdıra bilər.
