BAKI, AzerVoice, Orxan Qədirzadə
Sudanın faktiki lideri, general Abdel Fəttah əl-Burhan ölkədə davam edən münaqişənin həlli məqsədilə ABŞ prezidenti Donald Trampla əməkdaşlığa hazır olduğunu bəyan edib.
AzerVoice-un məlumatına görə, bu barədə Sudan Xarici İşlər Nazirliyi çərşənbə axşamı yayımladığı açıqlamada bildirib. Məlumat general əl-Burhanın Səudiyyə Ərəbistanının vəliəhdi Məhəmməd bin Salmanla görüşmək üçün Ər-Riyada səfərindən sonra açıqlanıb.
Bildirilib ki, vəliəhd şahzadə Məhəmməd bin Salman Vaşinqtona son səfəri zamanı ABŞ prezidenti Donald Trampa Sudanda sülhün təmin olunmasına dair plan təqdim edib.
Sudan tərəfinin açıqlamasına əsasən, əl-Burhan Donald Trampın “ölkədə sülhə nail olmaq və müharibəni dayandırmaq üçün səylərdə iştirak etmək əzmini” yüksək qiymətləndirib və bu prosesdə Səudiyyə Ərəbistanının rolunu vurğulayıb.
Açıqlamada qeyd olunub ki, Sudan rəhbərliyi Prezident Donald Tramp, ABŞ dövlət katibi Marko Rubio və ABŞ-ın Sudanda sülh üzrə xüsusi nümayəndəsi Massad Boulos ilə bu məqsədə nail olmaq üçün əməkdaşlığa hazırdır.
Qeyd edək ki, ABŞ, Misir, Səudiyyə Ərəbistanı və Birləşmiş Ərəb Əmirliklərinin vasitəçiliyi ilə aparılan beynəlxalq sülh səyləri general əl-Burhanın Boulos tərəfindən irəli sürülən son çərçivə təklifini rədd etməsindən sonra irəliləyiş əldə etməyib.
Sürətli Reaksiya Qüvvələri (SRQ) beynəlxalq atəşkəs planını dəstəklədiyini bəyan etsə də, xüsusilə Kordofan bölgəsinin cənubunda şiddətli döyüşlər davam edir. Hazırda nə ABŞ-ın vasitəçiliyi ilə aparılan danışıqlar, nə də BMT-nin paralel təşəbbüsü çərçivəsində yeni görüş tarixi açıqlanmayıb.
Xatırladaq ki, 2023-cü ilin aprelindən etibarən Sudanda ordu ilə ölkənin qərb bölgələrində və cənubun bəzi hissələrində mövqelərini möhkəmləndirən SRQ arasında müharibə davam edir. Münaqişə nəticəsində on minlərlə insan həlak olub, milyonlarla sakin evlərini tərk etməyə məcbur qalıb. BMT bu vəziyyəti “dünyanın ən ağır humanitar böhranı” kimi qiymətləndirir.
