BAKI,AzerVoice,Fərid Mikayılov
Pakistanın şimal-qərbində yerləşən Xayber-Paxtunxva əyalətində polis əməkdaşlarına qarşı törədilən terror hücumu nəticəsində beş nəfər həlak olub.
AzerVoice xəbər verir ki, Pakistanın daxili işlər naziri Mohsin Raza Naqvi hadisəni təsdiqləyərək hücumu terror aktı kimi qiymətləndirib və kəskin şəkildə pisləyib.
Məlumata görə, Kurram rayonunda neft obyektlərini mühafizə edən polis əməkdaşlarını daşıyan avtomobil naməlum silahlı şəxslərin hücumuna məruz qalıb. Hücum nəticəsində beş polis əməkdaşı hadisə yerində həyatını itirib.
Hadisə təhlükəsizlik qüvvələrinin bir neçə gün əvvəl Kurram rayonu yaxınlığında Tehrik-i-Taliban Pakistan (TTP) terror qruplaşmasının yerli liderlərindən birinin zərərsizləşdirilməsindən sonra baş verib.
Son aylarda Pakistanda, xüsusilə Xayber-Paxtunxva və Bəlucistan əyalətlərində silahlı qrupların təhlükəsizlik qüvvələrinə, polis bölmələrinə və mühüm infrastruktur obyektlərinə hücumlarının artdığı bildirilir. Rəsmi İslamabad ölkədə terror təhlükəsi ilə mübarizə tədbirlərini gücləndirdiyini açıqlayıb.
