BAKI, AzerVoice, Orxan Qədirzadə
ABŞ Prezidenti Donald Tramp İsrailin Baş naziri Benyamin Netanyahu ilə planlaşdırılan görüşü ərəfəsində mətbuat nümayəndələrinə açıqlamasında İranla bağlı diqqətçəkən bəyanatlar səsləndirib.
AzerVoice xəbər verir ki, Tramp İranın yenidən hərbi və siyasi potensialını bərpa etməyə çalışdığına dair məlumatlar aldıqlarını bildirib. ABŞ prezidenti qeyd edib ki, belə bir ssenari təsdiqlənərsə, Vaşinqton buna sərt cavab vermək məcburiyyətində qala bilər.
“İranın yenidən güc toplamağa çalışdığı barədə məlumatlar eşidirəm. Əgər bu doğrudursa, buna qarşı addımlar atılmalı olacaq. Ümid edirəm ki, bu mərhələyə gəlinməz. Eyni zamanda İranın razılaşma əldə etmək istədiyi də bildirilir. Əgər razılaşma niyyəti varsa, bu, müsbət haldır”, – deyə Tramp vurğulayıb.
Açıqlama ABŞ–İsrail münasibətlərinin, xüsusilə də İranın regional fəaliyyəti, nüvə proqramı və Yaxın Şərqdə təhlükəsizlik məsələlərinin müzakirə ediləcəyi Netanyahu–Tramp görüşü öncəsi səsləndirilib.
Analitiklərin fikrincə, Trampın bəyanatları bir tərəfdən Vaşinqtonun İranla bağlı sərt mövqeyinin davam etdiyini göstərir, digər tərəfdən isə mümkün diplomatik razılaşma üçün açıq qapı saxlandığına işarə edir.
