BAKI, AzerVoice, Fərid Mikayılov
Kolumbiya Prezidenti Qustavo Petro ABŞ prezidenti Donald Trampın açıqlamaları və ABŞ dövlət katibi Marko Rubionun mövqeyi ilə bağlı sərt bəyanatla çıxış edib.
AzerVoice xəbər verir ki, bu barədə Kolumbiya lideri rəsmi X hesabında paylaşım edib.
Petro bildirib ki, Trampın ingilis dilində səsləndirdiyi fikirlərin Kolumbiya mətbuatında necə tərcümə olunduğunu dəqiqləşdirdikdən sonra mövzuya münasibət bildirəcək və “qanunsuz təhdid” kimi qiymətləndirilən açıqlamaların real məzmunu aydınlaşmadan cavab verməyəcək.
O, Marko Rubionun Kolumbiya hakimiyyəti ilə bağlı səsləndirdiyi iddiaları qəti şəkildə təkzib edərək, bu açıqlamaların “tamamilə yanlış” olduğunu vurğulayıb. Onun sözlərinə görə, Rubionun mövqeyi Kolumbiyada ailəvi və ya kommersiya əlaqələri narkotik mafiyası ilə bağlı olan siyasi qrupların maraqlarına xidmət edir və məqsəd ABŞ–Kolumbiya münasibətlərini pozmaqdır. Petro bildirib ki, bu cür ssenari qlobal miqyasda kokain ticarətinin artmasına gətirib çıxara bilər.
Petro narkotiklərlə mübarizə sahəsində görülən tədbirlərə də toxunaraq bildirib ki, onun göstərişi ilə dünya tarixində ən iri kokain müsadirələrindən biri həyata keçirilib, koka yarpağı əkinlərinin artımı dayandırılıb və könüllü əkinlərin əvəzlənməsi proqramı çərçivəsində 30 min hektar sahə nəzarətə götürülüb. Prezident həmçinin əvvəlki hökumətlərin dövründə genişlənən və “kokainin Wall Street-i” adlandırılan Plateado (Kauka) bölgəsində dövlət nəzarətinin bərpa edildiyini açıqlayıb.
Kolumbiya lideri vurğulayıb ki, əməliyyatlar beynəlxalq humanitar hüquq normalarına uyğun aparılır və narkotik şəbəkələrinə tabe olan silahlı qrupların əsas rəhbərləri zərərsizləşdirilir. O xəbərdarlıq edib ki, kifayət qədər kəşfiyyat məlumatı olmadan aparılan bombardmanlar mülki itkilərə, xüsusilə uşaqların ölümünə səbəb ola bilər və bu, yeni silahlı qarşıdurmalar yaradar.
Prezident Petro paylaşımında Kolumbiya xalqına güvəndiyini bildirib və hər hansı qanunsuz zorakı addıma qarşı suverenliyin qorunmasının vacibliyini vurğulayıb. O qeyd edib ki, silahlı qüvvələrə Konstitusiyaya uyğun şəkildə yalnız ölkənin suverenliyini müdafiə etmək tapşırığı verilib.
Bəyanatını “Kolumbiya əbədi azad olacaq” sözləri ilə yekunlaşdıran Petro özünü “xalqın komandiri” kimi təqdim edib.
