BAKI,VOA, Fərid Mikayılov

İran Silahlı Qüvvələri Hörmüz boğazına nəzarətin özlərində olduğunu və ABŞ ilə hücumda iştirak edən tərəfdaşlarına boğazdan keçid hüququ verilməyəcəyini bəyan edib.

VOA xəbər verir ki, İran Silahlı Qüvvələrinin əməliyyatlarını koordinasiya edən Hatəmül-Ənbiya qərargahı bununla bağlı açıqlama yayıb.

Açıqlamada bildirilib ki, Hörmüz boğazı İran İnqilab Keşikçiləri Korpusunun dəniz qüvvələrinin nəzarəti altındadır.

“Şübhə və ya səhlənkarlıq olmadan bəyan edirik ki, Hörmüz boğazı İnqilab Keşikçilərinin cəsur dəniz qüvvələrinin ağıllı idarəçiliyi altındadır. ABŞ təcavüzkarlarının və onların tərəfdaşlarının bu boğazdan keçmək hüququ yoxdur” – deyə bəyanatda qeyd olunub.

Böyük Britaniyanın Dəniz Ticarəti Əməliyyatları Mərkəzi (UKMTO) isə Birləşmiş Ərəb Əmirliklərində yerləşən Cəbəl Əli limanının təxminən 65 kilometr şimalında bir konteyner gəmisinin naməlum obyekt tərəfindən vurulduğunu bildirib.

Məlumata görə, hadisə nəticəsində gəmidə kiçik yanğın baş verib, lakin bütün heyət üzvlərinin təhlükəsiz olduğu açıqlanıb.

Qurum bildirib ki, qaranlıq səbəbindən gəmidə yaranmış ziyanın miqyası hələ tam müəyyən edilməyib. Hadisə ilə bağlı araşdırma aparılır.

Regionda gərginlik artır

Məlumatlara görə, ABŞ və İsrailin İrana qarşı hərbi əməliyyatlarına cavab olaraq İranın bölgədə raket və pilotsuz uçuş aparatları ilə hücumları davam edir.

İran İnqilab Keşikçiləri daha əvvəl Hörmüz boğazını xüsusilə ABŞ və İsraillə əlaqəli gəmilər üçün bağladıqlarını bəyan etmişdi.