BAKI, VOA, Fərid Mikayılov

Kuba hökuməti ABŞ-ın siyasətinə sərt reaksiya verərək Vaşinqtonu ada xalqına qarşı “kollektiv cəza siyasəti” həyata keçirməkdə ittiham edib.

VOA xəbər verir ki, Kuba Xarici İşlər Nazirliyinin yaydığı açıqlamada bildirilib ki, ABŞ uzun illərdir ölkənin iqtisadiyyatını zəiflətməyə və beynəlxalq səviyyədə təcrid etməyə çalışır.

Rəsmi Havana qeyd edib ki, ABŞ iqtisadi çətinlikləri bəhanə edərək ölkənin resurslarına və iqtisadi imkanlarına nəzarət etmək niyyətindədir.

Açıqlamada vurğulanıb ki, bu siyasət “amansız iqtisadi müharibə” xarakteri daşıyır və əsas məqsəd ölkəyə təzyiq göstərməkdir.

Kuba rəhbərliyi bəyan edib ki, istənilən xarici təzyiq və ya müdaxilə cəhdinə qarşı ölkə müqavimət göstərməyə hazırdır.

Qeyd edək ki, ABŞ prezidenti Donald Tramp yanvarın 30-da Kübaya neft tədarük edən ölkələrə qarşı əlavə gömrük rüsumlarının tətbiqini nəzərdə tutan qərar imzalayıb.

Vaşinqton bu addımın milli təhlükəsizlik və xarici siyasət maraqlarının qorunmasına xidmət etdiyini bildirir. Kuba isə bu qərarı iqtisadi təzyiq aləti kimi qiymətləndirir və iddiaları rədd edir.