BAKI,VOA, Orxan Qədirzadə
Yunanıstanın Baş naziri Kiriakos Mitsotakis kənd təsərrüfatı subsidiyaları ilə bağlı 23 milyon avroluq mənimsəmə iddiaları fonunda Avropa Prokurorluğuna (EPPO) müraciət edərək, şübhəli şəxslər barəsində "gecikmədən" ittihamnamə hazırlanmasını tələb edib.
VOA xəbər verir ki, baş nazir bazar günü etdiyi çıxışında Aİ-nın kənd təsərrüfatı dəstəkləri ilə əlaqəli korrupsiya mexanizmində iştirakı ehtimal olunan millət vəkillərinə qarşı hüquqi prosedurların dərhal başladılmasını istəyib. Məlumata görə, qalmaqal nəticəsində artıq hökumətin 3 üzvü istefa verib, hakim "Yeni Demokratiya" partiyasının 11 deputatının isə toxunulmazlığının ləğv edilməsi gündəmə gəlib. Yunanıstan rəsmiləri 2018-ci ildən bəri fəaliyyət göstərən cinayətkar şəbəkənin saxta bəyanatlarla dövlət və Aİ vəsaitlərini taladığını müəyyən ediblər.
Araşdırmalar zamanı məlum olub ki, bəzi şəxslər onlara məxsus olmayan torpaqlar, o cümlədən arxeoloji ərazilər üçün subsidiya alıblar. Hətta sənədlərdə Olimpos dağında xəyali "banan plantasiyaları" qeyd edildiyi və heyvan sayının süni şəkildə artırıldığı üzə çıxıb. Mitsotakis bu hadisələri ölkədəki "qohumbazlıq bazarlığı" ilə əlaqələndirib və günahkarların həbs olunacağına, vəsaitlərin geri qaytarılacağına söz verib. Gələn il keçiriləcək seçkilər ərəfəsində baş verən bu hadisə Yunanıstan hökuməti üzərindəki siyasi təzyiqi maksimuma çatdırıb.
