BAKI,VOA, Fərid Mikayılov

ABŞ və İran arasında yeni danışıqların keçirilməsi planlaşdırılır.

VOA xəbər verir ki, CNN-in İranlı mənbəyə istinadən yaydığı məlumata görə, tərəflər arasında növbəti görüş 20 aprel tarixində İslamabadda baş tuta bilər.

Bildirilir ki, həm İran, həm də ABŞ nümayəndə heyətləri danışıqlar üçün Pakistan paytaxtında bir araya gələcək.

Mənbə görüşün dəqiq vaxtı ilə bağlı əlavə məlumat verməyib.

Xatırladaq ki, ABŞ və İsrailin 28 fevralda İrana qarşı başlatdığı hücumlar fonunda regionda gərginlik artmış, daha sonra 8 apreldə tərəflər arasında atəşkəs əldə olunmuşdu.

Aprelin 11-də isə Vaşinqton və Tehran nümayəndələri Pakistanın vasitəçiliyi ilə İslamabadda danışıqlar aparmışdı. Lakin bu görüşlər razılaşma olmadan başa çatıb.

ABŞ-ın vitse-prezidenti JD Vens həmin danışıqların nəticəsiz yekunlaşdığını açıqlamışdı.

İran tərəfi isə razılaşmanın əldə olunmamasını ABŞ-ın irəli sürdüyü yüksək tələblərlə əlaqələndirmişdi.