BAKI,VOA Orxan Qədirzadə

Amerika Birləşmiş Ştatları Demokrat Partiyası daxilində İsrailə münasibətdə ciddi fikir ayrılıqları və dəyişiklik meyilləri müşahidə olunur.

VOA KİV-ə istinadən xəbər verir ki, son aylarda partiya daxilində İsrailə ənənəvi güclü dəstəyin davam etdirilib-etdirilməməsi məsələsi açıq şəkildə müzakirə olunur. Belə ki, bu ay ABŞ Senatında 40 demokrat senator İsrailə silah satışının qadağan olunmasına səs verib ki, bu da partiyanın əvvəlki mövqeyindən ciddi kənarlaşma kimi qiymətləndirilir.

Ekspertlər qeyd edir ki, sözügedən qərarı dəstəkləyən senatorlar əsasən Benyamin Netanyahu hökumətinin siyasətini, xüsusilə Qəzza zolağı ilə bağlı hərbi əməliyyatları tənqid ediblər.

Məlumata görə, əvvəllər demokrat siyasətçilər İsrailin beynəlxalq hüququ pozması və ya humanitar böhran yaratması ilə bağlı açıq açıqlamalardan çəkinirdilər. Lakin hazırda bu yanaşmada dəyişiklik müşahidə olunur.

Ekspertlərə görə ictimai rəy sorğuları da bu dəyişikliyi təsdiqləyir. Araşdırmalara əsasən, ABŞ-da Netanyahuya etimad səviyyəsi əhəmiyyətli dərəcədə azalıb və xüsusilə demokrat seçicilər arasında bu göstərici daha aşağıdır.

2023-cü il hadisələrindən sonra Qəzzada baş verənlər bir çox demokrat tərəfindən mülki itkilərin artması və humanitar vəziyyətin ağırlaşması kimi qiymətləndirilir. Bu isə İsrail siyasətinə münasibətin dəyişməsinə səbəb olub.

Ekspertlər qeyd edir ki, Co Bayden administrasiyasının əvvəlki xəbərdarlıqlarına baxmayaraq, İsrailin hərbi kursu davam etdirilib və bu da tənqidlərin artmasına gətirib çıxarıb.

Bundan başqa, Birləşmiş Millətlər Təşkilatı və Human Rights Watch kimi qurumlar tərəfindən sənədləşdirilən hadisələr də ictimai rəyə təsir göstərib.

Qeyd olunur ki, ABŞ-da xüsusilə gənclər arasında keçirilən etiraz aksiyaları və sosial şəbəkələrdə yayılan məlumatlar İsrailə münasibətdə yeni baxışın formalaşmasında mühüm rol oynayıb.

Ekspertlər hesab edir ki, Demokrat Partiyası daxilində İsrailə qeyd-şərtsiz dəstək artıq əvvəlki kimi vahid mövqe deyil və Benyamin Netanyahu hökumətinin siyasəti bu dəyişikliyin əsas səbəblərindən biridir.

Ekspertlərin fikrincə, mövcud siyasi reallıq yaxın perspektivdə dəyişməyəcək və bu, ABŞ-İsrail münasibətlərində yeni mərhələnin formalaşdığını göstərir.