BAKI,VOA Orxan Qədirzadə
ABŞ Prezidenti Donald Trump administrasiyasının dövlət katibi Marko Rubio Çinə tətbiq olunan sanksiyalara baxmayaraq Pekinə səfər edə bilib.
VOA xəbər verir ki, Çin hökuməti bunun üçün Rubio soyadının Çin dilində yazılışında texniki dəyişiklik edib.
Bildirilir ki, Pekin hakimiyyəti Rubio soyadında istifadə olunan “Lu” heroqlifini başqa oxunuşa malik, lakin fərqli məna verən alternativ heroqliflə əvəz edib. Bu dəyişiklik sayəsində Çin rəhbərliyi formal olaraq 2020-ci ildə tətbiq etdiyi sanksiyaları ləğv etmədən amerikalı rəsmiyə ölkəyə giriş imkanı yaradıb.
Çin 2020-ci ildə senator olduğu dövrdə Marko Rubionu Sincan bölgəsində uyğur türkləri və Honkonq məsələsində sərt mövqeyinə görə sanksiya siyahısına daxil etmişdi. Həmin qərar Rubionun Çinə girişinə qadağanı da əhatə edirdi.
Qərb mediasında yer alan məlumatlarda qeyd olunur ki, Rubio üçün seçilən yeni heroqlif Çin dilində “kobud”, “sərt”, “patavatsız” və ya “düşüncəsiz” kimi mənalar daşıya bilər. Analitiklər bunu Pekinin Vaşinqtona yönəlmiş simvolik diplomatik mesajı kimi qiymətləndirirlər.
Diqqət çəkən digər detal isə Rubionun Pekinə uçarkən geyindiyi idman geyimi olub. Sosial şəbəkələrdə yayılan müzakirələrdə onun geyiminin vaxtilə Nicolás Maduro ilə bağlı görüntülərdə görünən geyimə bənzədiyi bildirilib. Bu addım bəzi istifadəçilər tərəfindən Vaşinqtonun siyasi mesajı kimi şərh olunub. Bununla belə, həmin iddialarla bağlı rəsmi təsdiq verilməyib.
Pekin səfəri çərçivəsində ABŞ və Çin nümayəndə heyətlərinin əsas müzakirə mövzuları ticarət münasibətləri, Tayvan məsələsi və İran ətrafındakı regional gərginlik olub. Rubio səfər zamanı ABŞ-ın Tayvan siyasətinin dəyişmədiyini də bəyan edib.
