BAKI,VOA, Fərid Mikayılov
Avropa İttifaqı Ukraynaya təqdim ediləcək yeni maliyyə dəstəyi çərçivəsində 3,2 milyard avroluq ilk ödənişin həyata keçirilməsi üçün mühüm addım atıb.
VOA xəbər verir ki, Avropa Komissiyasının iqtisadi məsələlər üzrə nümayəndəsi Valdis Dombrovskis Ukraynaya ayrılacaq makro-maliyyə yardımı ilə bağlı memorandum imzalayıb.
Sənəddə kredit ödənişlərinin mərhələləri, maliyyə dəstəyinin şərtləri və Ukraynanın yerinə yetirməli olduğu islahatlar əks olunub. Bildirilib ki, kredit şərtlərinə demokratiya, hüququn aliliyi, korrupsiyaya qarşı mübarizə və insan hüquqlarına hörmət kimi öhdəliklər daxildir.
Bundan əlavə, Ukraynanın ilk ödənişi əldə etməsi üçün rəqəmsal platformalardan əldə edilən gəlirlərin vergiyə cəlb edilməsi, dövlət investisiyaları üzrə strategiyaların hazırlanması və gömrük qanunvericiliyinin yenilənməsi istiqamətində addımlar atmalı olduğu qeyd edilib.
Qeyd edək ki, Avropa İttifaqı ölkələri daha əvvəl Ukraynaya 2026–2027-ci illər ərzində ümumilikdə 90 milyard avro kredit dəstəyi göstərilməsi barədə razılığa gəlib. İlk mərhələdə isə iyun ayının ortalarında 3,2 milyard avroluq vəsaitin ayrılması gözlənilir.
