BAKI,VOA Orxan Qədirzadə
Rusiyanın dövlət nüvə enerjisi şirkəti olan “Rosatom”un baş direktoru Aleksey Lixaçov bildirib ki, Avropanın ən böyük atom elektrik stansiyası hesab olunan Zaporojye Atom Elektrik Stansiyasının fəaliyyətinin bərpası yaxın perspektivdə mümkün ola bilər.
Onun sözlərinə görə, stansiyanın yenidən işə salınması üçün iki əsas şərtin yerinə yetirilməsi vacibdir. Bunlardan birincisi Ukraynadakı münaqişə ilə bağlı vəziyyətin həll olunması, ikincisi isə obyektin tam nüvə və ekoloji təhlükəsizliyinin təmin edilməsidir.
Aleksey Lixaçov qeyd edib ki, stansiyanın yenidən istismara verilməsi istiqamətində hazırlıq işləri davam etdirilir və bu proses zamanı beynəlxalq ictimaiyyət üçün qəbul edilə biləcək yanaşmanın formalaşdırılması nəzərdə tutulur.
“Rosatom” rəhbərinin sözlərinə görə, təhlükəsizlik, ekoloji səmərəlilik və iqtisadi baxımdan cəlbedicilik məsələləri stansiyanın gələcək fəaliyyəti ilə bağlı əsas meyarlar olacaq.
Zaporojye Atom Elektrik Stansiyası Avropanın ən böyük nüvə enerji obyektidir. Stansiyada hər biri VVER-1000 tipli olmaqla altı enerji bloku fəaliyyət göstərir.
Müəssisə 2022-ci il sentyabrın 11-dən etibarən elektrik enerjisi istehsal etmir. Hazırda stansiyanın bütün altı reaktoru soyuq dayanma rejimində saxlanılır.
Zaporojye Atom Elektrik Stansiyası 2022-ci ilin mart ayından etibarən Rusiya hərbi qüvvələrinin nəzarəti altındadır. Obyekt ətrafında təhlükəsizlik məsələləri ilə bağlı vəziyyət beynəlxalq təşkilatlar və nüvə təhlükəsizliyi üzrə qurumlar tərəfindən yaxından izlənilir.
