BAKI,VOA, Fərid Mikayılov
Almaniya və Fransa liderləri, Avropanın ən iddialı müdafiə proqramında sənaye mübahisələrini həll edə bilməyərək, yeni nəsil döyüş təyyarəsi inkişaf etdirmək üçün başlanan layihəni rəsmi olaraq dayandırmaq barədə razılığa gəliblər.
VOA xəbər verir ki, Almaniya Baş naziri Fridrix Merts və Fransa Prezidenti Emmanuel Makron, keçən həftə Monteneqroda keçirilən Aİ-Qərbi Balkanlar zirvəsinin fasilələrində layihənin problemlərini müzakirə edib və layihəyə daxil olan aviasiya şirkətləri arasında aylarla davam edən çıxmazı həll etmək üçün ümid olmadığını təsdiqləyiblər. Merts, Makrona ortaq döyüş təyyarəsi layihəsini davam etdirməmək tövsiyəsini verib.
Makron ofisindən verilən açıqlamada, iki liderin layihəni uzun müzakirə etdikləri, əsas sənaye tərəfdaşlarının – Airbus (Almaniya və İspaniya) və Dassault Aviation (Fransa) – razılığa gələ bilməməsindən təəssüf hissi duyduqları bildirilib.
Layihənin əsas sütununun dayandırılması, Avropa üçün Rusiyadan gələn təhlükənin artdığı bir dövrdə və ABŞ-ın qitədə silahlanmanı artırmaq üçün təzyiq göstərdiyi bir vaxtda baş verir. Macron layihəni 2017-ci ildə Merkel ilə birgə başlatmış və dəfələrlə müdafiə etmişdi.
İspaniyanı da əhatə edən 100 milyard avroluq layihədə razılığa gələ bilməmək, Avropanın müdafiə potensialını bərpa etməkdə uzun illərdir qarşılaşdığı çətinlikləri açıq göstərir.
