BAKI,VOA,Yusif Şərifzadə
Rusiyanın Kiyevə endirdiyi raket və pilotsuz uçuş aparatı zərbələri nəticəsində bir ailənin onilliklər ərzində topladığı qiymətli mədəni irs nümunələri yanaraq məhv olub.
VOA xəbər verir ki, 42 yaşlı mədəniyyət sahəsində çalışan İrina Plexova Rusiyanın hava hücumundan sonra dağıdılmış mənzilində ailəsinə məxsus qiymətli əşyaların külə çevrildiyini bildirib.
Onun sözlərinə görə, yanğın nəticəsində minlərlə kitab, ailənin uzun illər qoruduğu dini təsvirlər, eləcə də mərhum Roma Papası Fransisk tərəfindən ailəyə hədiyyə edilmiş təsbeh məhv olub.
İrina Plexova "Artıq heç nəyimiz qalmayıb. Hər şey tamamilə yanıb", – deyə bildirib.
Məlumata görə, Kiyevə iyulun 3-də həyata keçirilən raket və pilotsuz uçuş aparatı hücumu son dörd ildən artıq müddətdə paytaxta edilən ən dağıdıcı hücumlardan biri olub. Hücum nəticəsində azı 30 nəfər həlak olub və şəhərin müxtəlif ərazilərinə ciddi ziyan dəyib.
Bildirilir ki, Plexovanın ailəsi Ukraynanın ən böyük kino arxivinin yaxınlığında yaşayırdı. Hücum zamanı baş vermiş yanğın onların mənzilini tamamilə yararsız hala salıb.
Məhv olan əşyalar arasında təxminən 5 min köhnə kitab, ailənin İkinci Dünya müharibəsi dövründən qoruduğu dini təsvir, eləcə də gələcəkdə kino arxivinə təqdim edilməsi planlaşdırılan nadir video materiallar da olub.
