BAKI,VOA Orxan Qədirzadə
Nikaraqua Prezidenti Daniel Orteqa ölkədə bir daha "azad seçkilərin" keçirilməyəcəyini bəyan edib. Onun açıqlaması müxalifətin və beynəlxalq ictimaiyyətin sərt reaksiyasına səbəb olub.
Manaquada Sandinista İnqilabının 47-ci ildönümü münasibətilə keçirilən tədbirdə çıxış edən Orteqa ABŞ-ın ölkənin daxili işlərinə müdaxilə etdiyini iddia edərək müxalifətin yenidən hakimiyyətə gəlməsinə imkan verilməyəcəyini bildirib.
"ABŞ-ın və ya çevriliş tərəfdarlarının yaratdığı partiyaların yenidən hakimiyyətə gələcəyi dövr başa çatıb. ABŞ onlara nə qədər maliyyə dəstəyi versə də, buna nail ola bilməyəcək. Çevriliş tərəfdarlarının və vətən xainlərinin qarşısını almaq üçün qanunvericiliyi daha da gücləndirməliyik", – deyə Nikaraqua prezidenti bildirib.
Orteqa müxalifəti dövlət resurslarından şəxsi maraqlar üçün istifadə etməkdə ittiham edərək ölkədə hakimiyyəti dəyişdirmək məqsədilə seçkilərin bir daha keçirilməyəcəyini vurğulayıb.
Prezidentin bəyanatı müxalifət nümayəndələri tərəfindən tənqid edilib. Vətəndaşlıqdan məhrum edilmiş müxalif siyasətçi Feliks Maradiaqa Saens hakimiyyətin konstitusiyanı siyasi maraqlara uyğun şəkildə dəyişdirdiyini bildirib.
Digər müxalif lider Xuan Sebastyan Çamorro isə Orteqanın illərdir faktiki olaraq tətbiq etdiyi təkpartiyalı idarəetmə modelini artıq açıq şəkildə elan etdiyini deyib. Onun sözlərinə görə, hakimiyyət Çin, Şimali Koreya və Kubadakı siyasi sistemlərə bənzər uzunmüddətli təkpartiyalı model formalaşdırmağa çalışır.
ABŞ da Nikaraqua prezidentinin açıqlamalarına reaksiya verib. ABŞ dövlət katibi Marko Rubio Dövlət Departamenti vasitəsilə yaydığı bəyanatda Daniel Orteqanın seçkilərin tamamilə ləğv ediləcəyinə dair sözlərinin onun hakimiyyətinin avtoritar xarakterini açıq şəkildə nümayiş etdirdiyini bildirib.
Qeyd edək ki, 80 yaşlı Daniel Orteqa 2007-ci ildən fasiləsiz olaraq Nikaraquaya rəhbərlik edir. Son illərdə onun hakimiyyəti müxalifətə, müstəqil mediaya, qeyri-hökumət təşkilatlarına və insan hüquqları müdafiəçilərinə qarşı təzyiqləri artırmaqda ittiham olunur. Birləşmiş Millətlər Təşkilatının Nikaraqua üzrə Ekspertlər Qrupu hökumətin bəzi hərəkətlərinin insanlığa qarşı cinayət əlamətləri daşıya biləcəyini bildirib. Nikaraqua hakimiyyəti isə bu iddiaları rədd edərək onları ölkənin daxili işlərinə müdaxilə cəhdi kimi qiymətləndirir.
