BAKI,VOA Orxan Qədirzadə
ABŞ Prezidenti Donald Tramp administrasiyası dövlət xərclərinin azaldılması və diplomatik xidmətin yenidən təşkili planı çərçivəsində beş xarici diplomatik nümayəndəliyin fəaliyyətinə son verməyi planlaşdırır.
ABŞ Dövlət Departamenti bununla bağlı Konqresi məlumatlandırıb. Qərara əsasən, ABŞ-ın Kanada, Yaponiya, İndoneziya, Kamerun və Qrenadadakı beş diplomatik nümayəndəliyi bağlanacaq.
Bu addım ABŞ-ın eyni vaxtda bir neçə xarici nümayəndəliyini hər hansı konkret geosiyasi hadisə ilə əlaqəli olmadan bağlaması baxımından nadir qərarlardan biri hesab olunur.
Məlumata görə, Tramp administrasiyası ötən ilin əvvəlindən etibarən təxminən 10 diplomatik nümayəndəliyin bağlanmasını nəzərdə tutan plan üzərində işləyirdi.
Qərar Prezident Donald Trampın "Öncə Amerika" (America First) strategiyası çərçivəsində federal idarəetmənin və dövlət bürokratiyasının optimallaşdırılması siyasətinin tərkib hissəsi kimi qiymətləndirilir.
ABŞ Dövlət Katibi Marko Rubio xərclərin azaldılması tədbirlərini dəstəkləyərək bildirib ki, məqsəd mühafizəkar dairələrin həddindən artıq böyük və bürokratik hesab etdiyi dövlət aparatını daha səmərəli etməkdir.
Dövlət Departamenti nümayəndəliklərin bağlanmasını rəsmi şəkildə təsdiqləməsə də, qurum ABŞ-ın xaricdəki diplomatik fəaliyyətinin daha effektiv və səmərəli təşkili istiqamətində işlədiyini, həmçinin bu cür qərarlarla bağlı Konqresin məlumatlandırılması prosedurlarına riayət olunduğunu açıqlayıb.
Bununla yanaşı, Demokratlar Partiyasının nümayəndələri və bir sıra keçmiş xarici siyasət rəsmiləri diplomatik mövcudluğun azaldılmasının ABŞ-ın qlobal təsir imkanlarını zəiflədə biləcəyini bildirirlər. Onların fikrincə, ABŞ Beynəlxalq İnkişaf Agentliyinin (USAID) fəaliyyətinin məhdudlaşdırılması və diplomatik şəbəkənin ixtisarı Çin və Rusiya kimi rəqib dövlətlərin təsir imkanlarını genişləndirə bilər.
Xatırladaq ki, Prezident Co Bayden administrasiyası dövründə ABŞ Sakit okean regionunda bir neçə yeni diplomatik nümayəndəlik açmışdı. Bu addım Vaşinqtonun Çinlə bölgədə artan geosiyasi rəqabəti fonunda atılmışdı.
Məlumata görə, Çinin Kamerunun Duala və Kanadanın Vinnipeq şəhərlərində fəaliyyət göstərən diplomatik nümayəndəliyi olmasa da, Yaponiyanın Naqoya, İndoneziyanın Medan və Qrenadanın Sent-Corces şəhərlərində diplomatik təmsilçiliyi mövcuddur.
