ABŞ-ın ticarət kəsiri iyunda azalıb

ABŞ-da ticarət kəsiri iyun ayında 5,6 faiz azalaraq 73,3 milyard dollara düşüb. Həm idxal, həm də ixracın azalması bu nəticəyə təsir göstərib. İxrac 314,7 milyard dollar, mal ixracı isə 206,9 milyard dollar olub. Sənaye xammalı və xüsusilə xam neft ixracındakı azalma əsas amillərdən biri kimi göstərilir. Ekspertlər isə süni intellekt sahəsinin idxaldan asılılığı səbəbindən ticarət kəsirinin yenidən arta biləcəyini istisna etmirlər.

4 Avqust 2026 19:59

BAKI,VOA,Yusif Şərifzadə

ABŞ-da ticarət kəsiri iyun ayında azalsa da, ekspertlər bu tendensiyanın uzunmüddətli olmayacağını bildirirlər. Buna səbəb süni intellekt sahəsinin inkişafı fonunda idxaldan asılılığın davam etməsidir.

VOA xəbər verir ki, ABŞ Ticarət Nazirliyinin açıqladığı məlumata görə, iyun ayında həm idxal, həm də ixrac azalıb.

Nazirliyin İqtisadi Təhlil Bürosu və Siyahıyaalma Bürosunun məlumatına əsasən, ticarət kəsiri 5,6 faiz azalaraq 73,3 milyard dollara enib. Reuters agentliyinin sorğusunda iştirak edən iqtisadçılar isə bu göstəricinin 73 milyard dollar olacağını proqnozlaşdırmışdılar.

Məlumata görə, iyun ayında ABŞ-ın ixracı 0,9 faiz azalaraq 314,7 milyard dollara düşüb. Mal ixracı isə 1,9 faiz azalaraq 206,9 milyard dollar təşkil edib.

İxracın azalmasına əsasən sənaye xammalı və materiallarının, o cümlədən neft məhsullarının ixracındakı geriləmə təsir göstərib. Xam neft ixracı 5,7 milyard dollar azalıb ki, bu da orta satış qiymətinin aşağı düşməsi ilə əlaqələndirilir.

Məlumata əsasən, ABŞ xam neftinin orta ixrac qiyməti may ayında 107,82 dollar olduğu halda, iyunda 95,82 dollara enib.