BAKI,VOA, Fərid Mikayılov
Avropa İttifaqı ölkələri və Böyük Britaniya enerji ehtiyatlarının azalması və qarşıdan gələn qış fonunda Rusiya ilə münasibətləri yaxşılaşdırmaqda maraqlı ola bilər.
VOA xəbər verir ki, bunu Rusiya Prezidentinin xarici ölkələrlə investisiya-iqtisadi əməkdaşlıq üzrə xüsusi nümayəndəsi, Rusiya Birbaşa İnvestisiya Fondunun rəhbəri Kirill Dmitriyev bildirib.
Dmitriyev sosial şəbəkədəki paylaşımında qeyd edib ki, enerji ehtiyatlarının azalması və qışın yaxınlaşması şəraitində Rusiya ilə dialoqun bərpası Avropa İttifaqı və Böyük Britaniya üçün əsas məsələlərdən birinə çevrilir.
Onun sözlərinə görə, Avropada qaz ehtiyatlarının səviyyəsi enerji təhlükəsizliyi ilə bağlı narahatlıqları artırır. Dmitriyev daha əvvəl də Avropanın enerji bazarında vəziyyətin Rusiya qazından imtina fonunda çətinləşdiyini bildirmişdi.
Bu açıqlama Finlandiya Prezidenti Aleksandr Stubbin Rusiya ilə əlaqələrin bərpası barədə son fikirləri fonunda səslənib. Stubb yaxın həftələrdə və ya qarşıdakı iki ay ərzində Rusiya ilə əlaqə yaratmağa cəhd göstərilməsinin vacibliyini bildirib.
Dmitriyevin açıqlaması Avropanın enerji təhlükəsizliyi, qaz ehtiyatları və Rusiya ilə gələcək münasibətləri ətrafında müzakirələrin yenidən gündəmə gəldiyi bir vaxtda verilib.
