BAKI,VOA Orxan Qədirzadə
ABŞ Prezidenti Donald Trampın Şimali Koreya lideri Kim Çen Inlə bu ilin payızında, mümkün qədər tez bir zamanda görüşmək üçün köməkçilərinə təlimat verdiyi bildirilir.
“Wall Street Journal”ın ABŞ rəsmilərinə istinadən yaydığı məlumata görə, Tramp Asiyaya planlaşdırılan səfəri çərçivəsində Kimlə birbaşa danışıqlar keçirməyi müzakirə edib. Görüşün noyabr ayında Çinin Şençjen şəhərində keçiriləcək Asiya-Sakit Okean İqtisadi Əməkdaşlıq Forumu sammiti zamanı baş tutması ehtimal olunur.
Nəşr qeyd edib ki, rəsmi hazırlıqlara hələ başlanılmayıb. Bununla belə, Trampın Kimlə yenidən görüşmək istəyi onun xarici siyasətdə böyük nəticə əldə etməyə çalışdığını göstərir.
ABŞ rəsmiləri və analitiklər isə yeni görüşün ciddi irəliləyişlə nəticələnəcəyinə ehtiyatla yanaşırlar. Cənubi Koreya Vaşinqtonla Pxenyan arasında diplomatik dialoqu dəstəkləsə də, mümkün razılaşmanın Seul kimi regional müttəfiqlərlə münasibətlərə mənfi təsir göstərə biləcəyi barədə xəbərdarlıq edilir.
Tramp və Kim Çen In daha əvvəl üç dəfə görüşüblər. İlk görüş 2018-ci ildə Sinqapurda, ikinci görüş 2019-cu ildə Hanoyda keçirilib. Həmin danışıqlar Kimin nüvə proqramının tamamilə ləğvi ilə bağlı razılığa gəlməməsindən sonra nəticəsiz başa çatıb. Eyni il tərəflər Koreyalararası demilitarizasiya zonasında da görüşüblər.
Tramp son günlər Kimlə münasibətlərinin “əla” olduğunu bildirib və ABŞ-Cənubi Koreya birgə hərbi təlimlərinin bir hissəsinin azaldılmasını dəstəkləyib.
