BAKI,VOA,Yusif Şərifzadə
Meksikanın Sinaloa ştatının qubernatoru Ruben Roça ABŞ-nin narkotik qaçaqmalçılığı və Sinaloa karteli ilə əlaqələrə dair ittihamlarından sonra üç aydan çox davam edən fasiləni başa vuraraq vəzifəsinin icrasına qayıdıb. Meksika rəsmiləri ona qarşı irəli sürülən ittihamları təsdiqləyən kifayət qədər dəlil müəyyən edilmədiyini bildiriblər.
VOA xəbər verir ki, 77 yaşlı Ruben Roça cümə günü qubernator vəzifəsinin icrasını yenidən üzərinə götürdüyünü açıqlayıb. Meksikanın hakim Morena partiyasının üzvü olan Roça mayın əvvəlində ölkə hakimiyyətinin ABŞ tərəfindən təqdim olunan ittihamları araşdırması üçün müvəqqəti olaraq vəzifəsindən kənarlaşmışdı.
Roça sosial şəbəkədə yaydığı bəyanatda ona qarşı irəli sürülən ittihamları yenidən rədd edib. O, Meksika hüquq-mühafizə orqanlarının araşdırma nəticəsində ittihamları təsdiqləyən dəlil aşkar etmədiyini bildirib.
Qubernator ABŞ-də ona qarşı başladılan cinayət təqibini siyasi məqsədli addım kimi qiymətləndirib. Roçanın sözlərinə görə, bu proses Meksikanın suverenliyinə və Prezident Klaudiya Şeynbaumun rəhbərlik etdiyi sol siyasi hərəkata qarşı yönəlib.
Meksika indiyədək ABŞ-nin Roçanın saxlanılması istiqamətindəki təşəbbüslərinə qoşulmayıb. Meksika tərəfi Vaşinqtonun ölkə daxilində həbs qərarının çıxarılması və ya ekstradisiya prosedurunun başlanması üçün kifayət qədər dəlil təqdim etmədiyini bildirir.
ABŞ prokurorları isə Roça və daha doqquz hazırkı və keçmiş dövlət rəsmisini Sinaloa kartelinin “Los Chapitos” adlanan qolu ilə əlbir olmaqda ittiham edirlər. İddialara görə, rəsmilər siyasi dəstək və rüşvət müqabilində kartelin ABŞ-yə narkotik vasitələr daşımasına yardım ediblər.
Apreldə irəli sürülən ittiham ABŞ-nin Meksika narkotik kartellərinə qarşı mübarizəsində diqqətçəkən addımlardan biri kimi qiymətləndirilir. Belə ki, Vaşinqtonun hüquqi tədbirləri bu dəfə yalnız kartel rəhbərlərini deyil, fəaliyyətdə olan yüksək vəzifəli meksikalı siyasətçini də əhatə edib.
Roça bütün ittihamları dəfələrlə rədd edib. O, üç aydan artıq fasilədən sonra vəzifəsinə “başı dik” qayıtdığını bildirib. Hadisənin onsuz da narkotik qaçaqmalçılığı və təhlükəsizlik məsələlərində fikir ayrılıqları yaşayan Meksika ilə ABŞ arasında münasibətlərə əlavə gərginlik gətirə biləcəyi bildirilir.
