BAKI,VOA,Yusif Şərifzadə

İsrail ordusu BMT-nin Fələstinli Qaçqınlara Yardım və İşlər üzrə Agentliyinin (UNRWA) işğal altındakı İordan çayının qərb sahilində yerləşən obyektlərinə basqınları intensivləşdirib. Son əməliyyatlar Qələndiya və Küfr Əqabda yerləşən peşə hazırlığı müəssisələrini əhatə edib.

VOA xəbər verir ki, Ramallahdan məlumat verən jurnalist Sara Əbu əl-Rob İsrail ordusunun basqın etdiyi müəssisələrin İordan çayının qərb sahilinin müxtəlif ərazilərindən olan təxminən 16 min fələstinli qaçqına xidmət göstərdiyini bildirib.

Onun sözlərinə görə, son basqınlar İsrail hökumətinin fələstinli qaçqınlara yardım göstərən BMT agentliyinin fəaliyyətinin dayandırılmasına yönəlmiş daha geniş siyasəti fonunda həyata keçirilir.

Sara Əbu əl-Rob bildirib ki, agentlik işğal altındakı İordan çayının qərb sahilində yaşayan fələstinli qaçqınlara təhsil, səhiyyə və sosial xidmətlər göstərir.

İsrail ordusu bir neçə ay əvvəl agentliyin Qüdsdə yerləşən qərargahına da basqın etmişdi. Həmin vaxt əməkdaşların binadan məcburi şəkildə çıxarıldığı və tikilinin bəzi hissələrinin dağıdıldığı bildirilmişdi.

Jurnalist son basqınların İsraildə oktyabrda keçirilməsi nəzərdə tutulan seçkilərlə əlaqəli ola biləcəyini də qeyd edib.

Onun sözlərinə görə, İsrail hökumətində təmsil olunan ifrat sağçı nazirlər BMT agentliyinin və bir sıra digər təşkilatların fəaliyyətinin dayandırılmasına çağırırlar.

Son basqınların Qələndiya və Küfr Əqabda fələstinli qaçqınlara göstərilən xidmətlərə hansı səviyyədə təsir etdiyi barədə hələlik ətraflı məlumat verilməyib.