BAKI,VOA Orxan Qədirzadə
2001-ci il 11 sentyabr terror hücumlarının planlaşdırılmasının əsas şübhəlisi kimi tanınan Xalid Şeyx Məhəmməd 2028-ci ilin iyununda ABŞ hərbi məhkəməsi qarşısına çıxacaq.
ABŞ Hərbi Hava Qüvvələrinin podpolkovniki Maykl Şrama məhkəmənin 2027-ci ilin yanvarında başlaması ilə bağlı prokurorluğun təklifini rədd edib və prosesi təxminən 18 ay sonraya təyin edib.
Xalid Şeyx Məhəmməd 2003-cü ildə Pakistanda saxlanılıb. O, üç il Mərkəzi Kəşfiyyat İdarəsinin gizli həbsxanalarında saxlanıldıqdan sonra 2006-cı ildə Kubadakı Quantanamo hərbi bazasına köçürülüb.
O, 11 sentyabr hücumları ilə bağlı daha üç təqsirləndirilən şəxslə birlikdə mühakimə olunacaq. Məhəmməd Nyu-Yorkdakı Dünya Ticarət Mərkəzi və Pentaqona təyyarələrin qaçırılması yolu ilə təşkil edilən hücumların planlaşdırılmasında ittiham olunur.
Məhkəmə tarixinin müəyyənləşdirilməsi mümkün razılaşmanın rədd edilməsindən sonra baş verib. Həmin razılaşmaya əsasən, Məhəmmədin edam cəzası riski olmadan təqsirini etiraf etməsi nəzərdə tutulurdu.
ABŞ Senatının 2014-cü il hesabatında isə Mərkəzi Kəşfiyyat İdarəsinin Məhəmmədə qarşı sərt dindirmə üsullarından istifadə etdiyi və onun 183 dəfə suda boğulma imitasiyasına məruz qoyulduğu qeyd edilib.
