Nikaraqua Almaniyanı İsrailə hərbi dəstək göstərməklə Soyqırımın qarşısının alınması haqqında Konvensiyadan irəli gələn öhdəliklərini pozmaqda ittiham edir. İş üzrə dinləmələr sentyabrın 7-dən 10-dək Haaqadakı Beynəlxalq Ədalət Məhkəməsində keçirilir.
ArabAZ xəbər verir ki, Nikaraqua 2024-cü ildə Almaniyaya qarşı Beynəlxalq Ədalət Məhkəməsində iddia qaldıraraq Berlinin İsrailə silah və digər hərbi vasitələr göndərməklə Qəzzada törədilən soyqırımın həyata keçirilməsinə şərait yaratdığını bildirib.
Nikaraqua Almaniyanın 1948-ci il Soyqırım Konvensiyasını və beynəlxalq humanitar hüquq üzrə öhdəliklərini pozduğunu iddia edir.
Nikaraqua həmçinin Almaniyanın Fələstin ərazilərinə humanitar yardım məsələsində mövqeyini də beynəlxalq hüquq öhdəlikləri baxımından mübahisələndirib.
2024-cü ilin aprelində Beynəlxalq Ədalət Məhkəməsi Nikaraquanın Almaniyaya qarşı təcili müvəqqəti tədbirlərin tətbiqi tələbini təmin etməyib, lakin işi tamamilə rədd etməyib və əsas məhkəmə prosesinin davam etməsinə imkan verib.
Almaniya isə Nikaraquanın iddialarını rədd edir və məhkəmənin bu iş üzrə yurisdiksiyasının olmadığını bildirir. Berlin həmçinin Nikaraquanın iş üzrə zəruri hüquqi prosedurlara tam əməl etmədiyini iddia edir.
Almaniya sentyabrın 7-də məhkəmədən Nikaraquanın iddiasını rədd etməsini istəyib. Məhkəmənin yurisdiksiya ilə bağlı qərarının ilin sonlarına doğru verilməsi gözlənilir.
