BAKI,AzerVoice

Aparılan yeni araşdırmaya görə, "Lariocidin" adlı maddə, dərmanlara davamlı olanlar da daxil olmaqla, E. coli bakteriyasının müxtəlif növlərinə qarşı təsirli ola bilər.

AzerVoice xəbər verir ki, bu, dərmanlara davamlı bakteriyaları müalicə edə bilən yeni bir antibiotik sinfidir və son 30 ildə bazara çıxan ilk antibiotik hesab edilir.

Yeni kəşf edilən Lariocidin, bakteriya hüceyrəsində ribosom adlı hissəni hədəfə alaraq fəaliyyət göstərir və hüceyrənin funksiyalarını pozaraq onu məhv edir.

Kanadadakı McMaster Universitetinin professoru və araşdırmanın müəlliflərindən biri olan Ceri Rayt, bu kəşfin mühüm əhəmiyyət daşıdığını vurğulayıb.

"Bu, tamamilə yeni təsir mexanizminə malik bir molekuldur və bizim üçün böyük bir irəliləyişdir" - deyə o bildirib.

Nature jurnalında dərc olunan araşdırmaya görə, alimlər bir il ərzində torpaqdan toplanan bakteriyaları yetişdirərək bu yeni maddəni aşkar ediblər.

Tədqiqatçılar, bu maddənin E. coli kimi ciddi xəstəliklərə səbəb ola bilən bakteriyalara qarşı effektiv olduğunu təsdiqləyiblər. Üstəlik, Lariocidin insan hüceyrələri üçün toksik deyil.

Ümumdünya Səhiyyə Təşkilatı (ÜST) antimikrob davamlılığının (AMR) qlobal səhiyyə üçün ən ciddi təhlükələrdən biri olduğunu açıqlayıb.

ÜST-ün məlumatına görə, dünyada hər il təxminən 4,95 milyon ölüm antimikrob davamlılığı ilə əlaqəlidir. Avropa və Orta Asiyada isə hər il 133.000 insan bu səbəbdən həyatını itirir.