BAKI, AzerVoice

Şimali Amerikada ilk dəfə Henipavirus aşkar edilib – Pandemiya riski varmı?

AzerVoice xəbər verir ki, alimlər ABŞ-ın Alabama ştatında Camp Hill adlı yeni Henipavirus növünü aşkar ediblər. Bu, Şimali Amerikada indiyədək müəyyən edilmiş ilk Henipavirus hesab olunur.

Camp Hill virusu Kanada və ABŞ-da geniş yayılan şimal qısaquyruqlu siçanlarda aşkarlanıb. Mütəxəssislər bildirirlər ki, bu virusun insanlara keçmə potensialı hələ tam öyrənilməyib və təhlükə dərəcəsini müəyyən etmək üçün əlavə araşdırmalar aparılmalıdır.

Henipavirus ailəsinə aid digər viruslardan Hendra və Nipah virusları həm insanlarda, həm də heyvanlarda yüksək ölüm faizi ilə ağır xəstəliklərə səbəb olur. Nipah virusu ilə bağlı Cənub-Şərqi Asiyada baş verən epidemiyalarda ölüm göstəriciləri 40-75 faiz arasında dəyişib.

Araşdırma müəlliflərindən biri doktor Rhys Parry bu kəşfin Henipavirusların düşündüyümüzdən daha geniş coğrafiyada yayıla biləcəyini göstərdiyini bildirib. Onun sözlərinə görə, siçanlarda tapılan virusların insanlara ötürülməsi daha əvvəl Çində Langya virusu ilə də müşahidə olunub.

Tədqiqatda iştirak edən doktor Ariel İsaaks isə növbəti mərhələdə virusun hüceyrəyə daxil olmasını təmin edən əsas səth zülallarının xarakterizə olunacağını deyib. Bu, virusun strukturu və yoluxma mexanizmlərinin daha dərindən anlaşılması baxımından mühüm əhəmiyyət daşıyır.

Qeyd edək ki, Henipavirus ailəsinə daxil olan viruslara qarşı hələ ki, təsdiqlənmiş spesifik peyvənd və ya müalicə üsulu mövcud deyil. Bu səbəbdən belə virusların aşkarlanması pandemiyaya çevrilə biləcək risklərin erkən mərhələdə izlənməsi baxımından mühüm hesab olunur.