BAKI,VOA,Yusif Şərifzadə
Konqo Demokratik Respublikasının şimal-şərqində məcburi köçkünlərin yerləşdiyi düşərgələrdən birində may ayının əvvəlindən bəri azı 30 nəfərin öldüyü bildirilib.
VOA xəbər verir ki, düşərgə rəhbərliyi bu ölüm göstəricisinin indiyədək görünməmiş səviyyədə olduğunu açıqlayıb.
Məlumata görə, ölən şəxslərdən bəzilərində Ebola virusu təsdiqlənib ki, bu da xəstəliyin bölgədə sürətlə yayıla biləcəyi ilə bağlı narahatlıqları artırıb.
Söhbət Konqo Demokratik Respublikasında Ebola epidemiyasının mərkəzi hesab olunan Buniya şəhərində yerləşən Kiqonze düşərgəsindən gedir.
Düşərgə nümayəndələrinin və "Karitas" humanitar təşkilatının bildirdiyinə görə, bütün ölüm hallarının səbəbini müəyyənləşdirmək mümkün olmayıb.
Buna səbəb isə xəstələrin və onların yaxınlarının uzun müddət Ebola testindən keçməkdən imtina etməsi olub.
Məlumata əsasən, yalnız son günlərdə bəzi şəxslər müayinəyə razılıq veriblər.
Səhiyyə qurumları və humanitar təşkilatlar bölgədə vəziyyəti diqqətlə izləyir və virusun daha geniş yayılmasının qarşısını almaq üçün tədbirlərin gücləndirildiyini bildirirlər.
