BAKI, AzerVoice
İran və Özbəkistan arasında dəniz nəqliyyatı və logistika sahəsində əməkdaşlığı genişləndirmək məqsədilə Anlaşma Memorandumu imzalanıb.
AzerVoice xəbər verir ki, razılaşma Özbəkistanın özəl sektorunun İranın Şəhid Rəcəi Limanına investisiya yatırmasına şərait yaradacaq.
Sənəd Tehranda Özbəkistan Nəqliyyat Nazirliyinin Strateji Siyasətlər Baş İdarəsinin rəhbəri Bekzod Xolmatov və İran Limanlar və Dənizçilik Təşkilatının (PMO) Tranzit, Logistika və Razılaşmalar Baş İdarəsinin rəhbəri Kazem Salehi tərəfindən imzalanıb.
Tədbirdə İranın Yol və Şəhərsalma naziri Fərzanə Sadəq, Özbəkistan Nəqliyyat naziri Elxam Maxkamov və PMO-nun baş direktoru Səid Rasuli iştirak ediblər.
Razılaşmaya əsasən, Özbək investorlar üçün İranın Hörmüzqan şəhərində yerləşən və ölkənin ən böyük ticarət və konteyner limanı hesab olunan Şəhid Rəcəi Limanında xüsusi terminal və logistika mərkəzinin yaradılması imkanları araşdırılacaq.
Hər iki ölkə özəl sektorun bu layihələrə qoşulması üçün tələb olunan lisenziyaların və əməliyyat çərçivələrinin asanlaşdırılmasına dair öhdəlik götürüb.
İmzalanmadan sonra nazir Maxkamovun rəhbərlik etdiyi Özbək nümayəndə heyəti PMO rəhbərliyi ilə birlikdə Şəhid Rəcəi Limanını ziyarət edib. Səfər zamanı dəniz nəqliyyatı idarəetmə qülləsi, konteyner terminalı 2, avtomatlaşdırılmış anbarlar və 2 min 400 hektar sahəni əhatə edən logistika zonası ilə tanış olunub.
Maxkamov limanın inkişafını və potensialını yüksək qiymətləndirərək, onun regional ticarətdə strateji rol oynadığını vurğulayıb.
Özbək nazir ilə PMO rəhbərliyi arasında keçirilən görüşdə tranzit əməkdaşlığı və birgə investisiya məsələləri müzakirə olunub. Toplantıda hər iki ölkənin özəl logistika və gəmiçilik şirkətlərinin nümayəndələri də iştirak edib.
Səid Rasuli İran tərəfinin Memorandumu hüquqi müqaviləyə çevirməyə hazır olduğunu, Tehran rəhbərliyinin regional qonşularla iqtisadi əlaqələri gücləndirməkdə maraqlı olduğunu qeyd edib.
O, Özbəkistan şirkətlərinin investisiya danışıqlarına başlamaq üçün namizəd irəli sürməsini gözlədiklərini bildirib. O, həmçinin birgə müəssisə qurularaq planlaşdırılan obyektlərin idarə olunması üçün potensialın olduğunu vurğulayıb.
