BAKI, AzerVoice
"Nvidia" şirkəti ABŞ-ın tətbiq etdiyi sanksiyalar səbəbilə Çin üçün xüsusi olaraq "GeForce RTX 5090D v2" adlı videokart hazırlayır.
AzerVoice xəbər verir ki, bu barədə "Videocardz" portalı məlumat yayıb.
Məlumata əsasən, bu model əvvəlki "RTX 5090D" modelini əvəzləmək üçün hazırlanıb, çünki həmin model ABŞ-ın məhdudiyyətlərinə görə satışdan çıxarılıb. Yeni videokartın adı dəyişdirilsə də, bu versiya təkmilləşdirilmiş yox, əksinə daha sadələşdirilmiş olacaq.
Əsas dəyişikliklər videoyaddaş sistemindədir. Yaddaşın həcmi 32 GB-dan 24 GB-a endiriləcək, yaddaş şinası isə 512 bit yerinə 384 bit olacaq. Amma qrafik prosessor eyni qalacaq, buna görə də bir çox tapşırıqlarda əvvəlki səviyyədə performans gözlənilir.
İlkin məlumata görə, bu yeni modelin qiyməti əvvəlki ilə demək olar ki, eyni olacaq. Yəni texniki göstəricilər bir qədər azaldılsa da, qiymətə ciddi təsiri olmayacaq.
"GeForce RTX 5090D" yalnız Çin bazarı üçün yaradılıb və "Nvidia"nın ABŞ sanksiyalarına cavabı kimi ortaya çıxıb. Bu sanksiyalar Çinə yüksək gücə malik çiplərin və süni intellekt üçün nəzərdə tutulan texnologiyaların ixracını məhdudlaşdırır.
