BAKI, AzerVoice

İnsan Hüquqları İzləmə Təşkilatı (HRW) bildirib ki, Hindistan son həftələrdə yüzlərlə müsəlmanı “qanunsuz şəkildə” Banqladeşə deportasiya edib.

AzerVoice xəbər verir ki, HRW tərəfindən yayımlanan hesabatda bildirilir ki, Yeni Dehli may ayından bəri, əsasən Hindistanın Banqladeşlə sərhəddə yerləşən ştatlarında doğulmuş və böyük əksəriyyətini qadınlar və uşaqların təşkil etdiyi yüzlərlə benqal mənşəli müsəlmanı ölkədən çıxarıb.

Hesabatda vurğulanır ki, sərhəd mühafizəçiləri bəzi şəxslərin kimlik sənədlərini müsadirə edib, hətta bəzən onları silah gücünə Banqladeş ərazisinə keçməyə məcbur ediblər.

Banqladeş rəsmilərinin açıqlamasına görə, deportasiya edilən təxminən min 500 nəfərin bir hissəsinin Hindistan vətəndaşı olduğu təsdiqlənib. Həmçinin qeyd olunub ki, bu şəxslərin bəziləri Hindistana geri qayıdıb.

Qeyd edək ki, hesabatda qeyd olunur ki, bu deportasiya hallarının, Hindistanın nəzarətində olan Cammu və Kəşmir bölgəsinin Pahalgam rayonunda aprel ayında çox sayda insanın həyatını itirdiyi terror hücumundan sonra artdığı müşahidə olunur.

Həmin hücumdan sonra Hindistan hökumətinin xüsusilə müsəlman icmalarını hədəf alan “qanunsuz miqrant” axtarışlarını gücləndirdiyi iddia edilir. HRW-nin hesabatında hüquqi prosedurlar olmadan həyata keçirilən deportasiyalara son qoyulması, deportasiya olunan şəxslərə hüquqi müdafiə və apellyasiya imkanı yaradılması, məcburi deportasiya və zorakılıq iddialarının araşdırılması və məsul şəxslərin cəzalandırılması tələb edilir.

Hesabatda Hindistanın vətəndaşlıq, etnik mənsubiyyət və dini əsaslarla insanları özbaşına deportasiya etməsinin, beynəlxalq müqavilələr üzrə öhdəliklərini pozduğu vurğulanır.

HRW-nin Asiya direktoru Elaine Pearson hesabatda bildirib: “Hindistanda Bharatiya Janata Partiyası (BJP) hakimiyyəti benqal mənşəli müsəlmanları özbaşına ölkədən çıxararaq ayrı-seçkiliyi daha da dərinləşdirir. Aralarında Hindistan vətəndaşı olanlar da var və onlara heç bir hüquqi araşdırma və ya müdafiə imkanı verilmədən deportasiya olunurlar.”- deyə qeyd edib.

Banqladeş Xarici İşlər Nazirliyi isə məsələ ilə bağlı verdiyi açıqlamada “məcburi geri göndərmə” praktikasını pisləyib və yalnız Banqladeş vətəndaşı olduğu təsdiqlənmiş şəxslərin qəbul ediləcəyini bildirib.