BAKI,AzerVoice - “Azər Press” Media Agentliyi ilə İraq-Azərbaycan Dostluq Cəmiyyəti və İraq Respublikasının Respublika Strateji Tədqiqatlar Mərkəzi arasında media və informasiya sahəsində əməkdaşlığı gücləndirmək məqsədilə Anlaşma Memorandumu imzalanıb.
AzerVoice xəbər verir ki, müqavilənin məqsədi iki ölkə xalqları arasında qarşılıqlı tanışlığı dərinləşdirmək, siyasi, iqtisadi, sosial və mədəni sahələrdə peşəkar əməkdaşlığı inkişaf etdirmək və etibarlı informasiya mübadiləsini təmin etməkdir.
Memoranduma əsasən, tərəflər bir-birini öz ölkəsi ilə bağlı xəbərlərin əsas informasiya mənbəyi kimi qəbul edəcək, saxta xəbərlərlə mübarizədə əməkdaşlıq edəcək və rəsmi səfərlərin, tədbirlərin birgə işıqlandırılmasını həyata keçirəcəklər. Razılaşma həmçinin jurnalistlər arasında qarşılıqlı səfərləri, ixtisasartırma proqramlarını və texniki məlumat mübadiləsini nəzərdə tutur.
Sənəd tərəflərin təqdim olunan məlumatların düzgünlüyünü yoxlamaq öhdəliyini, media nümayəndələrinə qarşılıqlı dəstək göstərilməsini və beynəlxalq informasiya tədbirlərində iştirakın təşviqini də əhatə edir.
Anlaşma Memorandumu “Azər Press” Media Agentliyi Təsisçisi Rufiz Hafizoğlu və İraq-Azərbaycan Dostluq Cəmiyyəti, İraq Respublika Strateji Tədqiqatlar Mərkəzi direktoru Mötəz Muhi Əbdülhəmid tərəfindən imzalanıb.
