BAKI, AzerVoice, Nailə Babazadə
ABŞ Dövlət Departamenti, Polşaya 780 milyon dollar dəyərində hərbi satışa – 2 min 506 ədəd Javelin raketi və 253 buraxılış qurğusunun verilməsinə rəsmi olaraq razılıq verib. Bu barədə məlumat ABŞ Müdafiə Nazirliyinə bağlı Müdafiə Təhlükəsizlik Əməkdaşlığı Agentliyi (DSCA) tərəfindən yayımlanıb.
AzerVoice xəbər verir ki, agentliyin açıqlamasına görə, Polşa hökuməti raketlərlə yanaşı, onların texniki və logistika dəstəyi ilə bağlı müraciət edib və bu satış paketi Konqresə təqdim olunaraq təsdiqlənib. Bildirilib ki, satışın ümumi dəyəri 780 milyon dollar təşkil edir.
Satış çərçivəsində Polşaya yalnız raket və buraxılış qurğuları deyil, eyni zamanda raket simulyasiya mərmiləri, batareya soyutma blokları, alət dəstləri, ehtiyat hissələri, ABŞ hökuməti və podratçılar tərəfindən veriləcək texniki yardım, nəqliyyat və digər əlaqəli logistika dəstəkləri də təqdim olunacaq.
DSCA-nın məlumatına əsasən, bu satış, ABŞ-ın xarici siyasət və milli təhlükəsizlik maraqlarına uyğun olaraq, Avropada siyasi və iqtisadi sabitliyin qorunmasında mühüm rol oynayan NATO müttəfiqi Polşanın təhlükəsizliyini gücləndirməyə xidmət edəcək.
Eyni zamanda, bu silahlanma Polşanın köhnəlmiş hərbi infrastrukturunu modernləşdirəcək, ölkənin müdafiə qabiliyyətini artıracaq və NATO-nun kollektiv təhlükəsizlik tələblərinə uyğunluğunu daha da gücləndirəcək. Satışın, regionda hərbi güc balansını dəyişdirməyəcəyi və Polşanın bu sistemləri ordusuna problemsiz şəkildə inteqrasiya edə biləcəyi vurğulanıb.
