BAKI, AzerVoice, Nailə Babazadə
Madagaskarda hərbi çevrilişin ardından hakimiyyəti ələ alan Albay Maykl Randrianirina, cümə günü ölkənin keçid dövrü prezidenti kimi and içəcək.
AzerVoice xəbər verir ki, yerli mediada yayılan məlumatlara görə, Randrianirina, Yüksək Konstitusiya Məhkəməsində keçiriləcək mərasimdə and içərək vəzifəsinin icrasına başlayacaq. Bu mərasim ordunun elan etdiyi müvəqqəti konstitusiya bəyannaməsində qeyd olunan “yenidənqurma prosesinin” başlanğıcını ifadə edir.
Randrianirina bildirib ki, iki il davam edəcək keçid dövrü ərzində ölkədə ictimai asayişin bərpa olunması, yeni konstitusiya çərçivəsinin hazırlanması və seçkilərin keçirilməsi nəzərdə tutulur. Bu prosesin sonunda idarəetmə sivil hakimiyyətə təhvil veriləcək.
Afrika Birliyi Barış və Təhlükəsizlik Komissiyasının açıqlamasına görə, Madagaskarda baş verən hadisələrlə bağlı qurum təcili iclas çağırıb. Komissiya sədri Mahmud Ali Yusuf bəyan edib ki, Madagaskarın qurumdakı üzvlüyü dayandırılıb və qərar dərhal qüvvəyə minib. O, “Güc deyil, hüququn aliliyi əsas olmalıdır,” – deyə vurğulayıb.
Xatırladaq ki, ölkədə sentyabr ayının sonunda elektrik və su kəsintilərinə etiraz olaraq başlayan nümayişlər qısa müddətdə hökumət əleyhinə genişmiqyaslı aksiyalara çevrilmişdi. Toqquşmalar nəticəsində 22 nəfər həlak olmuş, yüzlərlə insan yaralanmışdı. Ordunun bəzi bölmələrinin etirazçılara dəstək verməsi isə hakimiyyət daxilində parçalanmanı dərinləşdirmişdi.
Fransız RFI radiosunun 13 oktyabr tarixli məlumatına görə, prezident Andri Rajolina Fransız ordusuna məxsus təyyarə ilə ölkəni gizlicə tərk edib. Daha sonra, 14 oktyabr səhəri Rajolina Milli Məclisi buraxdığını elan etmiş, lakin Məclis prezidentin vəzifədən uzaqlaşdırılması barədə qərar qəbul etmişdi.
Ardınca Albay Randrianirina komandanlığındakı hərbi qüvvələr Prezident Sarayına daxil olaraq hakimiyyəti ələ keçirdiklərini və konstitusiyanın dayandırıldığını açıqlamışdı. Hərbi komitə darbedən sonra Milli Məclis istisna olmaqla bütün dövlət institutlarının fəaliyyətini dondurduğunu elan edib.
