BAKI, AzerVoice, Nailə Babazadə
Avropa İttifaqı (Aİ) ölkələrində Tesla markalı avtomobillərin satışları sentyabr ayında ötən ilin eyni dövrü ilə müqayisədə 18,6 faiz azalıb.
AzerVoice xəbər verir ki, Avropa Avtomobil İstehsalçıları Assosiasiyasının (ACEA) məlumatına görə, ABŞ-li milyarder Elon Maskın sahibi olduğu Tesla şirkətinin satışları Aİ bazarında azalma tendensiyasını davam etdirir. Şirkətin satışları Avropada ardıcıl 9-cu aydır geriləmə göstərir.
Ötən ilin sentyabr ayında Aİ ölkələrində 31 min 535 ədəd Tesla satıldığı halda, bu ilin eyni dövründə rəqəm 25 min 656-ya düşüb. Bununla da Tesla-nın Aİ bazarındakı satış payı 3,9 faizdən 2,9 faizə enib.
Yanvar–sentyabr dövründə şirkətin satışları ötən ilin eyni dövrü ilə müqayisədə 38,7 faiz azalıb — 2023-cü ildə 181 min 572 olan satış sayı bu il 111 min 328-ə enib. Tesla-nın Aİ bazarındakı ümumi payı isə 2,3 faizdən 1,4 faizə düşüb.
Aİ-yə üzv ölkələr, Avropa Azad Ticarət Assosiasiyasına daxil İsveçrə, Norveç və İslandiya, həmçinin Böyük Britaniya bazarlarını əhatə edən göstəricilərə əsasən, Tesla satışları sentyabrda ötən ilin eyni ayına görə 10,5 faiz azalaraq 39 min 837, yanvar–sentyabr dövründə isə 28,5 faiz geriləyərək 173 min 694 olub.
Ekspertlərə görə, Tesla-nın Avropada satışlarının azalmasında şirkət rəhbəri Elon Maskın mübahisəli davranışları, ABŞ-ın prezidenti Donald Tramp ilə yaxın əlaqələri və Avropadakı sağçı siyasətçilərə açıq dəstəyi mühüm rol oynayıb. Bu amillər Avropalı istehlakçıların şirkətdən uzaqlaşmasına səbəb olub.
