BAKI, AzerVoice, Nailə Babazadə
Niderlandda keçirilən ümumi seçkilərdə səsvermə prosesi bu gün başlayıb. Ölkədə yerli vaxtla saat 10:30-da başlayan səsvermə 23:00-a qədər davam edəcək.
Seçkilərdə 27 siyasi partiya və min 166 namizəd parlamentdəki 150 yer uğrunda mübarizə aparır. Namizədlər arasında 34 türk mənşəli siyasətçi də yer alır. Ekspertlərə görə, heç bir partiyanın 76 deputatlıq çoxluq əldə edərək təkbaşına hökumət qurması gözlənilmir.
İlkin nəticələrin gecə gec saatlarda, rəsmi nəticələrin isə 7 noyabrda açıqlanacağı bildirilib. Səsvermə başa çatdıqdan sonra Niderland mediası çıxış anketlərini (exit poll) yayımlamağa başlayacaq.
Rəsmi nəticələr elan edildikdən sonra hökumət qurmaq üçün danışıqlar mərhələsi başlayacaq. Ən çox mandat qazanan partiyanın digər siyasi qüvvələrlə koalisiya müzakirələrinə başlaması gözlənilir. Analitiklər bu prosesin bir neçə gün, hətta aylarla davam edə biləcəyini istisna etmirlər.
Son illərdə ardıcıl koalisiya hökumətləri ilə idarə olunan Niderlandda, hökumət qurmaq üçün parlamentdəki 150 deputatdan ən azı 76-nın dəstəyi tələb olunur.
Qeyd edək ki, ölkədə 2024-cü ilin iyulunda formalaşan dördlü koalisiya hökuməti, ifrat sağçı PVV partiyasının miqrasiya siyasəti ilə bağlı fikir ayrılığı səbəbilə 3 iyun tarixində, bir ilini tamamlamadan dağılmışdı.
Avqust ayında isə İsrailə qarşı sərt tədbirlərin görülməməsi səbəbilə NSC partiyasının da hökumətdən çəkilməsi nəticəsində, hazırda koalisiyada yalnız VVD və BBB partiyaları qalıb.
Son 4 hökumətin hamısı miqrasiya siyasətindəki ziddiyyətlər üzündən vaxtından əvvəl seçkilərə getməyə məcbur olub. Bu səbəbdən Niderland qısaömürlü hökumətlər və tez-tez keçirilən seçkilər dövrünü yaşayır.
