BAKI, AzerVoice, Nailə Babazadə

ABŞ, Böyük Britaniya və Avstraliya “nüvə ilə işləyən sualtı gəmi alyansı” kimi tanınan AUKUS ortaq təhlükəsizlik sazişi üzrə işləri sürətləndirməyə qərar verib.

AzerVoice xəbər verir ki, ABŞ-ın müdafiə naziri Pit Hegsət, Böyük Britaniyanın müdafiə naziri Con Hili və Avstraliya baş nazir müavini və müdafiə naziri Rişard Marls ABŞ-ın paytaxtı Vaşinqtonda görüşüblər və görüş barədə ortaq açıqlama verilib.

Açıqlamaya görə, görüşdə AUKUS sazişinə sadiqliklərini təsdiqləyən nazirlər əməkdaşlığın uzunmüddətli uğur qazanması üçün prosesin sürətləndirilməsi və qısa müddətli hərbi hədəflərə fokuslanmaq barədə razılığa gəliblər.

Nazirlər üç ölkənin ortaq idarə etdiyi sualtı gəmi sənaye bazasını dəstəkləmək üçün lazım olan infrastruktur və işçi qüvvəsinin təmin edilməsinə “tam sürətlə irəliləmək” qərarı veriblər.

ABŞ və Böyük Britaniyanın texnologiya transferi vasitəsilə Avstraliyanın nüvə enerjisi ilə işləyən sualtı gəmi donanması yaratmasını hədəfləyən AUKUS sazişi 2021-ci ilin sentyabrında imzalanıb.

Ölkələrin adlarının ingiliscə qısaltmasından yaranan AUKUS təhlükəsizlik sazişi çərçivəsində Cənubi Avstraliya əyalətinin paytaxtı Adelaide-dəki gəmi təmir zavodlarında nüvə enerjisi ilə işləyən ən azı 8 sualtı gəmi tikiləcək.

Sazişdə Çin adının çəkilməməsinə baxmayaraq, üç ölkənin “artan regional təhlükəsizlik narahatlıqları”na vurğu etməsi, əməkdaşlığın Pekinin bölgədəki hərbi gücünü tarazlamağa yönəlmiş bir pakt olduğu şərhlərinə səbəb olmuşdu.

ABŞ isə əvvəlki liderlərin dönəmində imzalanan milyardlarla dollarlıq sazişi “Əvvəlcə Amerika” siyasəti çərçivəsində ətraflı şəkildə nəzərdən keçirəcəyini bildirib.

Digər tərəfdən, ABŞ Müdafiə Nazirliyi 5 aylıq araşdırmadan sonra AUKUS sazişinə dəstəyini davam etdirməyə qərar verib.