BAKI,AzerVoice, Nailə Babazadə
Gələn il Avstriyada keçiriləcək Avroviziya Mahnı Müsabiqəsinə İsrailin qatılmamasının qadağan olunması üçün başlanan imza kampaniyasında bu günə qədər 600 mindən çox insan iştirak edib.
AzerVoice xəbər verir ki, Avaaz Qlobal Vətəndaşlıq Platformasında təşkil olunan kampaniya, İsrailin 2026-cı il Avroviziya Mahnı Müsabiqəsinə qatılmasına icazə verilməsindən sonra start götürüb. Kampaniyada bütün yayımlayıcılara və Avropa Yayım Birliyinə (EBU) müraciət edilərək, İsrailin iştirakının dərhal dayandırılması tələb olunub.
Bəyanatda qeyd olunur ki, İsrail hökuməti Qəzzadakı mülki şəxslərə qarşı hücumları dayandırmalı, jurnalistləri və ailələrini hədəfə almağı dayandırmalı və beynəlxalq humanitar hüquqa əməl etməlidir. Əks halda, İsrailin Avroviziya müsabiqəsinə qatılması qadağan edilməlidir.
Kampaniyada həmçinin vurğulanır ki, Qəzza bölgəsində iki ildən artıqdır davam edən zorakılıqlara və gündəlik hücumlara baxmayaraq, İsrailin müsabiqəyə qatılmasına icazə verilib. Bu səbəbdən bəzi ölkələr Avroviziyanı boykot etmə qərarı alıb.
Təşkilatçılardan qərarı dəyişdirmək üçün daha çox ölkənin eyni addımı atması və milli yayımlayıcılara yarışmadan çəkilmələri üçün təzyiq göstərilməsi tələb olunur.
“Fələstinlilərə qarşı apardığı ayrı-seçkilik və zorakılıq davam edərkən, İsrailin musiqi və işıqlarla bu cinayətlərini ört-basdır etməsinə imkan verə bilmərik. Gələn il İsrailə Avroviziya yoxdur, onların cinayətlərinə ortaq olmaq yoxdur.” - deyə bəyanətdə qeyd olunub.
Hazırda imza kampaniyasında iştirak edənlərin sayı təxminən 609 min nəfərdir.
Qeyd edək ki, Avropa Yayım Birliyi (EBU) 4 dekabrda Cenevrədə 95-ci EBU Ümumi Məclis Toplantısını keçirib. İsrailin 2026 Avroviziya Mahnı Müsabiqəsinə qatılması oylamadan kənar buraxıldıqdan sonra İspaniya, Hollandiya, Slovenya, İrlandiya və İzlandiya dövlət televiziya kanalları qərarı protest edərək yarışmadan çəkilmək qərarı alıblar.
