BAKI, AzerVoice, Nailə Babazadə
Yapon hakimiyyəti Fukuşima fəlakətindən on ildən çox sonra işləməyən vəziyyətdə olan dünyanın ən böyük nüvə elektrik stansiyası – Kaşivazaki-Kariwa stansiyasını yenidən işə salmaq qərarı verib. Bu addım, ölkənin enerji tələbatını kömür və qaz kimi idxal olunan yanacaq mənbələrindən uzaqlaşdırmaq strategiyasında mühüm dönüş nöqtəsi hesab olunur.
AzerVoice xəbər verir ki, Niigata prefekturasında yerləşən stansiyanın yerli əhali arasında narahatlıqlara baxmayaraq, prefektura şurası Tokyo Elektrik Enerji Şirkəti (TEPCO) tərəfindən yeddi reaktordan birinin yenidən işə salınmasına icazə verən qərarı təsdiqləyib. Şirkət 6 nömrəli reaktorun yanvar ayının 20-si civarında fəaliyyətə başlamasını planlaşdırır.
2011-ci ildə baş vermiş 9,0 bal gücündə zəlzələ və tsunaminin Fukuşima Daiichi stansiyasında yaratdığı nüvə əriməsi sonrası Yaponiya nüvə enerjisinə qarşı son dərəcə ehtiyatlı siyasət yürüdüb. 1986-cı ildəki Çernobildən bəri baş vermiş ən ağır nüvə fəlakəti nəticəsində ölkə 54 nüvə stansiyasının hamısını bağlamışdı. Dünya Nüvə Assosiasiyasının məlumatına görə, bu müddət ərzində işlək vəziyyətdə olan 33 reaktordan 14-ü yenidən fəaliyyətə qayıdıb. Niigatada yerləşən Kaşivazaki-Kariwa stansiyası isə TEPCO tərəfindən Fukuşimadan dərs alaraq yenilənmiş ilk müəssisə olacaq.
Fukuşima öncəsi Yaponiya elektrik istehsalının təxminən 30 faizini nüvə reaktorlardan təmin olunurdu. Hazırda isə ölkə enerjinin böyük hissəsini (təxminən 60-70 faiz) idxal olunan kömür və təbii qaz vasitəsilə qarşılayır.
Yeni Baş nazir Takaichi Sanae enerji xərclərini azaltmaq, inflyasiyaya qarşı mübarizə aparmaq və enerji təhlükəsizliyini təmin etmək məqsədilə nüvə enerjisinin yenidən istifadəsini güclü şəkildə dəstəkləyir. Yaponiya 2050-ci ilədək net sıfır emissiyaya çatmağı hədəfləyir və 2040-cı ilədək nüvə enerjisinin payını 20faizə yüksəltməyi planlaşdırır.
Bununla belə, Fukuşima xatirəsi hələ də tazədir və yerli sakinlərin böyük hissəsi təhlükəsizlik səbəbindən nüvə enerjisinin yenidən istifadəsinə qarşı çıxır. TEPCO isə Kaşivazaki-Kariwa stansiyasının Fukuşimadan dərs alaraq yenilənmiş təhlükəsizlik tədbirləri ilə təchiz olunduğunu və 6 nömrəli reaktorun fəaliyyətə başlamağa hazır olduğunu bildirir.
